Аксилмонополия қўмитаси қолипли нон нархи кескин кўтарилгани бўйича изоҳ берди
Қўмита нон ишлаб чиқарувчи ва сотувчилар ҳамда аҳолидан «ижтимоий тармоқлар орқали тарқатилаётган асосланманган маълумотларга ишониб, сунъий ажиотаж вужудга келтирмасликни» сўраган.
Монополияга қарши курашиш қўмитаси томонидан қолипли нон нархи бўйича тезкор ўрганишлар ўтказилди. Бу ҳақда қўмита матбуот хизмати хабар берди.
Унга кўра, қолипли нон нархи Тошкент шаҳрида энг юқори — 2800 сўм, Қашқадарёда вилоятида энг паст — 1650 сўм, республика бўйича ўртача нарх эса 2250 сўм экани аниқланган.
Шунингдек, ун маҳсулоти 2022 йил июнь ойидан бошлаб биржа савдоларига етарли миқдорда қўйилаётгани ва бу жараён устидан доимий назорат ўрнатилгани маълум қилинди. Республикада ун маҳсулоти заҳираси шакллантирилган бўлиб, нарх наволарнинг кескин ошиб кетмаслиги учун зарур миқдорда ун савдоларга қўйиб борилади.
Қайд этилишича, июнь ойида 170 минг тонна ун биржага қўйилиши, бунда ҳар бир нон ишлаб чиқарувчи учун тенг шароит яратиш мақсадида кичик лотларда (3 тоннадан) қўйилмоқда. 1 июнь ҳолатида 50,5 минг тоннадан ортиқ ун маҳсулоти қолдиғи мавжуд бўлиб, август ойи учун ҳам ун ишлаб чиқариш учун корхоналарда зарур дон захиралари мавжуд.
«Ун маҳсулоти реализация қилинишининг бозор тамойилларига асосланган механизми жорий қилиниши, биринчи навбатда буғдой етиштирувчи фермер ва деҳқонлардан тортиб, ишлаб чиқарувчи ва истеъмолчилар манфаатини кўзлаб қилинган қадам бўлиб, ушбу жараёнда шаффоф тизим яратилиши билан бирга республиканинг энг чекка ҳудудларига ҳам маҳсулотнинг етиб борилиши назоратга олинган», дейилади хабарда.
Қўмита шуни эътиборга олиб, нон ишлаб чиқарувчи ва сотувчилар ҳамда аҳолидан бу борада ҳавотирга тушмаслик, «ижтимоий тармоқлар орқали тарқатилаётган асосланманган маълумотларга ишониб, сунъий ажиотаж вужудга келтирмасликни» сўраган.
Бозорда сунъий танқислик юзага келиши ва нархларнинг кескин ошиб кетиш ҳолатлари кузатилганида Монополияга қарши курашиш қўмитасининг ишонч телефонига +998 71 207 47 00, қўмита ҳузуридаги Истеъмолчилар ҳуқуқини ҳимоя қилиш агентлиги Call-марказига (1159 қисқа рақам) мурожаат қилиш мумкин.