АҚШда август ойида ишсизлик даражаси 3,7 фоизга ошди. Бу ҳақда АҚШ Федерал Меҳнат статистикаси бюроси маълумот берди.

Маълум қилинишича, июль ойида ишсизлик кўрсаткичи 3,5 фоизни ташкил этган. Ишсизлар сони 344 мингга ошиб, 6 миллион кишига етган. Ишлайдиган америкаликларнинг 6,5 фоизи август ойида пандемия чекловлари туфайли масофадан туриб ишлаган. 

Бу кўрсаткич июль ойидагидан бироз пасайган. Июль ойида ишчиларнинг 7,1 фоизи масофадан ишлаган.

АҚШ Меҳнат вазирлиги маълумотларига кўра, август ойида кутилганидан кўпроқ — 315 минг янги иш ўрни яратилган. Ҳозирда бу миқдор пандемиядан олдингига қараганда 240 мингтага кўп бўлиб, кетма-кет 20 ойлик иш ўринлари ўсишини англатади.  

Умуман олганда, охирги 12 ой ичида АҚШда пандемиядан кейин меҳнат бозорининг тикланиши фонида 5,8 миллион янги иш ўрни яратилган. 

Август ойида энг кўп янги иш ўринлари хизмат кўрсатиш ва сервис соҳасида — 68 мингта, шундан 14 мингтаси — компьютер тизимларини ривожлантириш ва тегишли хизматлар соҳасида, 13 мингтаси — бошқарув ва техник маслаҳат хизматлари, 10 мингтаси — архитектура ва муҳандислик хизматлари соҳасида янги иш ўринлари ташкил этилди.  

Юридик хизмат кўрсатиш соҳасида иш ўринлари сони 9 мингтага камайган. Соғлиқни сақлаш соҳасида 48 минг, чакана савдода 44 минг, саноат ишлаб чиқаришида 22 минг янги иш ўрни яратилган.

Ўртача иш ҳафтаси 0,1 соатга қисқариб, 34,5 соатни ташкил этган.

Эслатиб ўтамиз, АҚШда январь ойида ишсизлик даражаси 4 фоизга ошгани хабар берилган эди.