«Бизга эркинлик берди»: Тиньков Горбачёвни «энг яхши сиёсатчи» деб атади
Олег Тиньков марҳум Михаил Горбачёвнинг оиласига ҳамдардлик билдириб, уни энг яхши сиёсатчи деб атади. «У барчамизга эркинлик ва цивилизациялашган дунёда яшаш имкониятини берди, ҳозиргилар ҳаммасини ўраб олмоқда», — деб ёзди тадбиркор.
Тадбиркор Олег Тиньков икки кун олдин вафот этган СССР собиқ президенти Михаил Горбачёвнинг оиласига ҳамдардлик билдирди. Бу ҳақда бизнесмен Instagram’даги саҳифасида пост эълон қилди.
«Михаил Горбачёвнинг оиласига чуқур ҳамдардлик билдираман. У энг яхши сиёсатчи эди, барчамизга эркинлик ва цивилизациялашган дунёда яшаш имкониятини берди, ҳозиргилар ҳаммасини ўраб олмоқда», — деб ёзди Тиньков.
Шунингдек, у Горбачёв рафиқаси Раиса Горбачёва лейкемиядан вафот этганидан кейин мамлакатда қон саратонига қарши курашда энг кўп иш қилганини таъкидлади.
Россияда 2021 йилда онкогематологияни ривожлантиришни қўллаб-қувватловчи Tinkoff оиласи хайрия жамғармасига асос солган тадбиркор: «Бизнинг жамғармамиз кўпроқ ишлар қилишга ҳаракат қилмоқда», — деб ёзди.
Охирги уч йил давомида Тиньков лейкемиядан даволанди.
Михаил Горбачёв 30 август куни кечқурун оғир ва узоқ давом этган касалликдан сўнг вафот этди. У 91 ёшда эди.
Россия президенти Владимир Путин 31 август куни Горбачёвнинг оила аъзолари ва яқинларига ҳамдардлик билдириб, уни «жаҳон тарихи ривожига улкан таъсир кўрсатган давлат арбоби» деб атади.