Иқтисодиётда «нисбатан қатъий» пул-кредит шароити юзага келмоқда — Марказий банк
Марказий банк 2022 йилнинг июнь-июль ойларида асосий ставканинг 2 фоизга туширилиши ва йиллик инфляциянинг сезиларли ўзгаришсиз сақланиб қолаётгани ҳисобига «нисбатан қатъий» пул-кредит шароитлари сақланиб қолаётганини таъкидлади. Шунингдек, банклараро пул бозорида ўртача тортилган фоиз ставкалари августда 14,6 фоизгача пасайган.
Баъзи омиллар ҳисобига Ўзбекистон иқтисодиётида «нисбатан қатъий» пул-кредит шароитлари юзага келмоқда. Бу ҳақда Марказий банкнинг 8 cентябрдаги йиғилишида маълум қилинди.
Қайд этилишича, 2022 йилнинг июнь-июль ойларида асосий ставканинг 2 фоиз бандга пасайтирилиши ва йиллик инфляциянинг сезиларли ўзгаришсиз прогнозлар доирасида сақланиб қолаётганлиги ҳисобига иқтисодиётда «нисбатан қатъий» пул-кредит шароитлари юзага келмоқда.
Банклараро пул бозорида ўртача тортилган фоиз ставкалари августда 14,6 фоизгача пасайди ва UZONIA индекси кичик тебранишлар билан тўлиқ фоиз коридори доирасида шаклланди.
Асосий ставка пасайтирилиши таъсирида миллий валютадаги муддатли депозитлар бўйича ўртача тортилган фоиз ставкаларида ҳам бироз пасайиш кузатилиб, июль ойида жисмоний шахсларники бўйича 20,8 фоизга ва юридик шахсларники — 17,2 фоизга тенг бўлди.
Депозитлар бозоридаги ижобий реал фоиз ставкаларнинг сақланиб қолаётганлиги миллий валютадаги муддатли депозитларининг ҳажмининг жорий йилнинг ўтган 8 ойида сезиларли даражада ўсишига (25,3 фоиз) таъсир кўрсатди.
Миллий валютадаги кредитлар фоиз ставкаларидаги пасайиш динамикаси август ойида ҳам сақланиб қолди.
Эслатиб ўтамиз, аввалроқ Ўзбекистонда иқлим ўзгаришлари пул-кредит сиёсатига таъсир кўрсатаётгани маълум қилинганди.
Шунингек, Марказий банк пул-кредити операцион механизми ва кўрсаткичларига ўзгартиришлар киритганди.