…Исроил 15 июнь, чоршанба куни Европа Иттифоқи давлатларига табиий газ экспорт қилиш бўйича келишувни имзолади. Бу ҳақда маҳаллий Kan телеканали хабар берди.

Қайд этилишича, Исроил энергетика вазири Карин Эльхарар Мисрда Европа Комиссияси президенти Урсула фон дер Лейн ва Миср вакиллари билан учрашиб, бу борада ўзаро англашув меморандумини имзолаган. Газ Европага Миср орқали етказилади, бу ҳам келишувнинг бир қисмига айланди.

Шартнома имзоланган кундан бошлаб уч йил давомида амал қилади. Шундан сўнг у автоматик равишда яна икки йилга узайтирилади.

Имзоланган меморандумга кўра, Исроил, Миср ва Европа Иттифоқи табиий газдан камида 2030 йилгача энергия мақсадларида фойдаланилишини тан олади.

Шундан сўнг Европада газ истеъмоли 2050 йилгача, Европа Иттифоқига аъзо давлатлар ноль эмиссия иқтисодиётига ўтиш мажбуриятини олгунча аста-секин камаяди.

Томонлар, шунингдек, Европа Иттифоқи компанияларининг Исроил ва Миср сувларида табиий газни қидириш ва қазиб олиш бўйича рақобат тартиб-таомилларида иштирок этишини рағбатлантиришга келишиб олган.

Россия, ЕИ ва газ

Россия нефтига қисман эмбаргони ўз ичига олган санкцияларнинг олтинчи пакети қабул қилинганидан сўнг Европа Иттифоқи Россиядан газ импортини тақиқлашни ўз ичига олиши мумкин бўлган еттинчи санкциялар пакети устида иш бошлади.

Бироқ энергетика бўйича Россияга энг тобе бўлган давлатлар бунга қарши чиқмоқда, баъзи Европа давлатлари эса Россиядан тўғридан-тўғри газ олишни аллақачон тўхтатган.

Масалан, аввалроқ Польша, Нидерландия, Дания, Болгария ва Финляндия янги схема бўйича Россия гази учун рублда пул тўлашдан бош тортган эди.