Миллиардер Варданян Россия фуқаролигидан воз кечади
Бойлиги 2021 йил 1 млрд долларга баҳоланган Рубен Варданян Россия фуқаролигидан воз кечишини айтди. Тадбиркор тан олинмаган Тоғли Қорабоғ республикасига кўчиб ўтади.
Тадбиркор ва инвестор Рубен Варданян Россия фуқаролигидан воз кечишга қарор қилганини айтди. Бу ҳақда Forbes Россия нашри ёзмоқда.
«Мен таваккал қилаётганимни тушуниб, Россия фуқаролигидан воз кечишга ва Арманистон фуқароси сифатида Арцахга кўчиб ўтишга қарор қилдим. Бу мен учун жуда қийин, лекин тўғри қарор бўлди», — дейди у ўз видеомурожаатида.
Арцах — тан олинмаган Тоғли Қорабоғ республикасининг арманча номи.
«Афсуски, Арцахдаги сўнгги икки йил воқеалари кўпчиликнинг бефарқ бўлиб, ўзини ташлаб кетилгани, ҳеч кимга керак эмаслигини ҳис қилишига олиб келди. Менимча, бу қабул қилинмаслиги керак. Ишонаманки, 2020 йилги урушдан кейин биз — бутун дунё арманлари Арцах билан бирга бўлишимиз керак», — дейди.
Варданяннинг қўшимча қилишича, у бу ҳаракатни Арцах ўзи учун нақадар муҳимлигини мисол орқали кўрсатишнинг ягона йўли деб ҳисоблайди.
Фуқароликдан воз кечиб, кўчиб ўтган Варданян Россиядаги барча активларини оилавий фондга ўтказади.
«Мен ҳамма нарсани шериклар раҳбариятига бераман, оилавий фондга ўтказаман», — деди тадбиркор РБКга.
Варданян Ереванда туғилган. У — 2011 йилда «Сбербанк» сотиб олган «Тройка Диалог» инвестиция компаниясининг асосчиси ва собиқ эгаси.
Forbes 2021 йил Варданяннинг бойлигини 1 миллиард долларга баҳолаган эди.
Аввалроқ Freedom Finance сармоя компанияси асосчиси Тимур Турлов ҳам Россия фуқаролигидан воз кечганди.