NASA бир ҳафта ичида иккинчи марта Ойга янги миссия бошлашни кечиктирди
NASA «Артемида» дастури доирасида Ойга янги миссиянинг биринчи парвозини беш кун ичида иккинчи марта кечиктирди. Ракетани парвозга тайёрлаш жараёнида суюқ водород сизиб чиқиши аниқланган, бироқ носозликни жойида бартараф этишнинг имкони бўлмаган.
НАСА Ойга амалга оширилиши кутилган «Артемида I» экспедициясини 2-марта кечиктирди. Бу ҳақда халқаро космик агентлик расмий саҳифасида хабар берилди.
Маълум қилинишича, ракетага ёқилғи тўлдириш вақтида суюқ водород сизиб чиқиши аниқланган. Ракетага водород етказиб бериладиган алоқа қисмларини алмаштириш орқали муаммони ҳал қилишга қаратилган кўплаб уринишлар натижа бермаган. Агентлик муҳандислар маълумотларни йиғишда давом этаётганини таъкидлаган.
Шунингдек, муаммоларни бартараф этиш зарурати билан бир қаторда миссия жадвалдан ортда қолиб, қайта ишга тушириш ишларини якунлаш учун жуда кам вақт қолган. Агентликнинг қўшимча қилишича, парвоз ракетанинг орбитага кўтарилиши учун белгиланган вақтдан 3 соат олдин бекор қилинган.
NASA 5 кун ичида иккинчи марта Ойга амалга ошириладиган учувчисиз миссияни бекор қилди. Олдинги парвоз 29 август кунига белгиланиб, бошқа ёнилғи каналидаги сизиб чиқиш, ҳарорат сенсори синиши ва изоляцион кўприкдаги ёрилиш каби муаммолар сабаб бекор қилинганди.
NASA кейинги уриниш қачон амалга оширилишини маълум қилмаган эди. Бироқ Reutersʼга кўра бу 5 ёки 6 сентябрда бўлиши мумкин. Аммо, агар NASA ракетани учириш майдончасидан вертикал монтаж биносига қайтаришга қарор қилса, кейинги уриниш октябрь ойининг иккинчи ярмигача амалга оширилмаслиги мумкин, деб ёзди Bloomberg NASA маъмури Билл Нелсонга таяниб.
Бу NASAʼнинг янги ракетаси – Space Launch System учун «Орион» космик кемаси билан илк парвоз бўлиши керак. Американинг The Planetary Society нодавлат ташкилоти ҳисоб-китобларига кўра, ракетани қуриш ишлари 2010 йилда бошланган ва жараён чўзилиб кетган.
Лойиҳа буджети дастлабки 7 миллиард доллардан 23 миллиард долларга ошиб кетган.Reuters агентлигининг таъкидлашича, учиришнинг кечикиши ва техник муаммолар янги ракеталар учун ноодатий ҳол, чунки муҳандислар парвоздан олдинги барча протседураларни синаб кўришади ва такрорлашади.
Шунингдек, NASAʼнинг «Артемида» янги ой дастури астронавтларни, шу жумладан биринчи аёлни ҳам Ойга қайта жўнатишни мақсад қилган биринчи парвоз бўлиши керак. Одамлар охирги марта 1972 йилда «Аполлон-17» миссияси доирасида Ойда бўлган. «Артемида» нинг бир қисми сифатида NASA Марсга кейинги экспедициялар учун таянч сифатида Ойда узоқ муддатли база яратишни режалаштирмоқда.
Эслатиб ўтамиз, аввалроқ NASA ойга астронавт қўндиришни 2025 йилга қолдиргани ҳақида хабар берилганди.
Шунингдек, NASA биринчи марта бошқа сайёрадан ракета учириши ҳақида айтилганди.