Ўзбекистон бозорларидаги нархлар: нима арзонлашиб, нималар қимматлашди?
Иқтисодий тараққиёт ва камбағалликни қисқартириш вазирлиги Ўзбекистонда 1—12 декабрь кунлари бозорларда қишлоқ хўжалиги ва гўшт маҳсулотларининг улгуржи нархлари бўйича таҳлил эълон қилди
Иқтисодий тараққиёт ва камбағалликни қисқартириш вазирлиги 1—12 декабрь кунлари давомида асосий турдаги қишлоқ хўжалиги ва гўшт маҳсулотларининг улгуржи нархлари ўзгариши юзасидан таҳлилий маълумот эълон қилинди.
Маълум бўлишича, бу давр мобайнида бозорда саримсоқ пиёз 2 750 сўмга, банан 2 500 сўмга, апельсин 1 000 сўмга, лавлаги 500 сўмга арзонлаган.
Шунингдек, булғор қалампири (қизил) 5 500, булғор қалампири (яшил), нок (маҳаллий) 4 000 сўмга, олма (импорт), нок (импорт) ва нўхат 2 500 сўмга, помидор (қизил) ҳамда гуруч (аланга) 1 000 сўмга, карам, мош 500 сўмга ошган.
Давлат божхона қўмитасининг тезкор маълумотларига асосан, умумий қиймати 35,9 млн долларлик (ўтган йилнинг мос даврига нисбатан 6,6 доллари кам) жами 47,2 минг тонна (12,8 минг тонна кам) қишлоқ хўжалиги маҳсулотлари экспорти амалга оширилди.
Хусусан, мазкур даврда 9,7 минг тонна узум, 8,3 минг тонна хурмо, 4,6 минг тонна ловия, 3,5 минг тонна мош, 2,4 минг тонна қуритилган мева, 2,0 минг тоннадан майиз ва помидор, 1,6 минг тонна гулкарам ташқи бозорларга етказиб берилган.
Шунингдек, ушбу давр мобайнида 7,2 млн долларлик (ўтган йилнинг мос даврига нисбатан 3,2 минг доллар кам) қийматидаги жами 29,6 минг тонна (10,9 минг тонна кам) қишлоқ хўжалиги маҳсулотлари, хусусан, 15,3 минг тонна картошка, 4,5 минг тонна мандарин, 4,1 минг тонна пиёз, 2,9 минг тонна банан, 694 тонна апельсин ҳамда 454 тонна киви импорт қилинган.
Тезкор маълумотларга асосан, «Қўйлиқ» бозорига ҳудудлардан жами 7,4 минг тонна, хусусан, 3,4 минг тонна картошка, 3,2 минг тонна пиёз, 286 тонна карам ва 530 тонна сабзи келтирилган.
Хусусан:
- Самарқанддан 586 тонна, Тошкент вилоятидан 391 тонна картошка;
- Жиззахдан 1 050 тонна, Самарқанддан 922 тонна, Тошкент вилоятидан 893 тонна пиёз;
- Тошкент вилоятидан 286 тонна карам;
- Қашқадарёдан 312 тонна, Сурхондарёдан 88 тонна, Тошкентдан 78 тонна, Бухородан 52 тонна сабзи етказиб берилган.
Шунингдек, «Қўйлиқ» бозорига Қозоғистондан 1 976 тонна ва Қирғизистондан 386 тонна картошка ҳамда Қозоғистондан 318 тонна пиёз келтирилган.
Шу билан бирга, ҳудудлардан «Чорсу» деҳқон бозорига жами 146,4 тонна, шу жумладан, 132,5 тонна мол гўшти ва 13,9 тонна қўй гўшти келтириб сотилган.