Ўзбекистондан Россияга қишлоқ хўжалиги маҳсулотлари экспорти 2021 йилга нисбатан 52 фоизга ўсиб 222,5 миллион долларга етди. Бу ҳақда Инвестициялар ва ташқи савдо вазири Жамшид Хўжаев ва  Россия ҳукумат раиснинг ўринбосари Виктория Абрамченко ўртасидаги учрашувда маълум қилинди.

Қайд этилишича, йиғилиш озиқ-овқат хавфсизлигини таъминлаш, қишлоқ хўжалиги маҳсулотларини ўзаро этказиб беришни кўпайтириш масалаларига бағишланган. 

Хабарга кўра, 2022 йилнинг январь-июль ойларида Ўзбекистондан Россияга қишлоқ хўжалиги маҳсулотлари экспорти 2021 йилнинг шу даврига нисбатан 52 фоизга ўсиб, 222,5 миллион долларни ташкил этган. Ушбу йўналишда ўзаро алоқаларни ривожлантириш бўйича келишувларга эришилган.

Шунингдек, Жамшид Хўжаев 1 сентябрь куни Россия ҳукумат раисининг ўринбосари Денис Мантуров билан учрашувида ўзбек ишлаб чиқарувчиларининг тўқимачилик саноати маҳсулотлари, маиший техника ва қурилиш материалларини Россия бозорига етказиб бериш ҳажмини ошириш имкониятларини муҳокама қилган.

Яна бир ўринбосар Алексей Оверчук билан бўлиб ўтган суҳбат чоғида савдо-иқтисодий ҳамкорлик масалалари ҳақида сўз борган.

Россиянинг иқтисодий ривожланиш вазири Максим Решетников билан учрашувда юқори қўшилган қийматга эга маҳсулотларни ўзаро етказиб беришни кўпайтириш, ҳудудлараро ҳамкорликни кенгайтириш ва ўзбек-россия ҳамкорлигининг кун тартибидаги бошқа долзарб масалалар муҳокама қилинган.

Эслатиб ўтамиз, аввалроқ Ўзбекистон ҳудудидан Россияга асосан нималар экспорт қилиниши ҳақида маълумот берилганди.