Саудия Арабистони иқтисодиёти 2011 йилдан кейинги энг юқори чораклик ўсишни қайд этди
Таҳлилчилар Саудия Арабистони иқтисодиёти ўсишини, асосан, нефть секторига боғламоқда. Шунингдек, мамлакатда ишсизлик ҳам 2008 йилдан кейинги энг паст даражага тушгани қайд этилди.
Саудия Арабистони иқтисодиёти 2022 йилнинг иккинчи чорагида 11,8 фоизга ўсди, бу 2011 йилдан кейинги энг тез суръатдир. Бу ҳақда Bloomberg мамлакат бош статистика бошқармаси маълумотларига таяниб хабар бермоқда.
Таҳлилчиларнинг дастлабки ҳисоб-китобларига кўра, нефть сектори 2021 йилга нисбатан 23,1 фоизга, нонефть сектори эса 5,4 фоизга ўсган.
Шу фонда Саудия Арабистонида ишсизлик 2008 йилдан кейинги энг паст даражага тушди. Кўрсаткич йилнинг биринчи чорагида июнь ойидаги 11 фоизга нисбатан 10,1 фоизни ташкил этган.
Саудия Арабистони иқтисодиётининг ўсиши нефть нархининг кўтарилиши ва унинг ишлаб чиқариш ҳажмининг ошиши фонида содир бўлмоқда. Йил бошидан бери Россиянинг Украинага ҳужуми фонида нефть нархи 40 фоиздан ошди.
Нефть бўйича вазият
Аввалроқ Саудия Арабистони давлати назорати остидаги Saudi Aramco компанияси Осиёга июнь ойида етказиб бериладиган Arab Light нефтининг нархини май ойидаги 9,35 доллардан сўнгги 4 ой ичида биринчи марта бир баррель учун 4,40 долларга туширганди.
Мамлакат Россиянинг Украинага бошланганидан кейин Brent нархи 100 доллардан ошиб кетганидан бери биринчи марта нефть нархини пасайтирди.
Маълумот учун, Saudi Aramco компаниясининг соф фойдаси 2022 йилнинг биринчи чорагида 39,5 миллиард долларни ташкил этди, бу 2021 йилнинг шу даврига нисбатан 82 фоизга кўпдир.
Шунингдек, АҚШ Президенти Жо Байден бутун дунё бўйлаб нефть ва газ компанияларини ёқилғи нархи ошиши фонида энергия ишлаб чиқаришни кўпайтиришга чақирди.
Кейинчалик, Саудия Арабистонига АҚШ Президенти Жо Байден ташриф буюрганидан сўнг Ар-Риёд жаҳон нефть бозорида мувозанатни сақлашга ваъда берди.
Ташриф якунлари бўйича қўшма баёнотга кўра, АҚШ ва Саудия Арабистони барқарор глобал энергия бозорига содиқликларини яна бир бор тасдиқлади.