«Сен катта бўлгунинггача Tesla ҳам Ўзбекистонга келади» — Мирзиёев
Нукуслик бемор болакай Президентга «келажакда Tesla’нинг раҳбари бўлишини» айтиб берди.
Шавкат Мирзиёев Тошкентдаги янгидан барпо этилган Болалар гематологияси, онкологияси ва клиник иммунологияси марказида яратилган шароитлар билан танишди. Марказда даволанаётган нукуслик болалардан бири Президентга келажакда Tesla’нинг бошлиғи бўлишни ният қилганини айтди.
Кичик бемор Президентга ўз орзусини айтиб берди.
«Мен шифохонадан тезроқ чиқишни, келажакда ота-онамнинг яхши яшаши ва Tesla заводининг бошлиғи бўлишни хоҳлайман», — дейди у.
Шавкат Мирзиёев кичик беморга жавоб берар экан, Қорақалпоғистон ривожланаётганини ва кўплаб заводлар қурилишини айтди.
«Мана, Қорақалпоғистон қанча ривожланяпти. Худо хоҳласа, катта заводлар очилади, сен катта бўлгунинггача Tesla ҳам Ўзбекистонга келади», — деди Президент.
Маълумот учун, давлат раҳбари онкогематологик ёрдам соҳасида амалга оширилаётган ишлар ва эришилган натижалар, оналик ва болалик муҳофазасини янада такомиллаштириш ҳамда тиббиёт ходимлари билан ўтказилган мулоқотда берилган топшириқлар ижросининг бориши юзасидан йиғилиш ўтказмоқда.