Сингапурда энг бой грузиялик миллиардернинг Credid Suisseʼга даъвоси бўйича суд бошланди
Сингапурда 5 сентябрь куни Грузиянинг собиқ бош вазири ва мамлакатнинг энг бой миллиардери Бидзина Иванишвилининг Швейцария Credit Suisse банкининг маҳаллий бўлими — CS Trustʼга нисбатан даъвоси бўйича суд жараёни бошланди.
Сингапурда 5 сентябрь куни Грузиянинг энг бой одами Бидзина Иванишвилининг Цюрихдаги Credit Suisse банкининг маҳаллий бўлимига қарши даъвоси юзасидан суд жараёни бошланди. Бу ҳақда Bloomberg хабар берди.
Маълум қилинишича, собиқ бош вазир CS Trustʼдан собиқ банк бошқарувчисининг хатти-ҳаракатлари туфайли кўрган 800 миллион долларлик зарарни қоплашни талаб қилмоқда. Bloombergʼга кўра суднинг очилиш кунида Иванишвили видеоалоқа орқали кўрсатма беради. Март ойи охирида у Бермуддаги худди шу масала бўйича Credit Suisse билан судда ғалаба қозонган.
«Банк 500 миллион доллар тўлаши керак», деб ёзади Financial Times.
Бермуддаги даъво банкнинг маҳаллий тузилмаси — Credit Suisse Life Bermudʼга қарши олиб борилган.
Шунингдек, Иванишвили Янги Зеландиядаги Credit Suisseʼдан ҳам умумий 800 миллион доллар талаб қилмоқда.
Bloombergʼнинг ёзишича, Бермуддаги суд жараёни миллиардернинг банк билан қарама-қаршилигида муҳим аҳамиятга эга, чунки бу председент яратиши мумкин. Иванишвили банкнинг собиқ менежери Патрис Лескодроннинг ҳаракатаридан жабр кўрганини иддао қилмоқда.
У 2018 йилда фирибгарликда айбланиб, 2019 йилда озодликка чиққан ва 2020 йилда ўз жонига қасд қилган. Лескодрон 2008 йилдаги молиявий инқироз пайтидаги йўқотишларни мижозларнинг пуллари ҳисобига қоплашни бошлаганини тан олган.
The Wall Street Journal ёзишича, Швейцария банк регулятори FINMA эълон қилган ҳисоботидан келиб чиққан ҳолда, Credit Suisse менежернинг ҳаракатларига изоҳ берган, бироқ банк тегишли чораларни кўрмаган.
Credit Suisse буни рад этди ва ҳисобот эълон қилиниши билан у Иванашвили ва бошқа инвесторларга қарши Лондон судига мурожаат қилди. Август ойида банкнинг Сингапур суд жараёнини бекор қилиш талаблари рад этилди, бироқ Credit Suisse адвокатлари суд жараёни банкнинг эмас, CS Trustʼнинг жавобгарлиги билан чекланиши кераклигини исботлашди.
Singapore Trust адвокатлари судгача бўлган аризаларида «жаноб Иванишвили томонидан тайинланган инвестиция менежерлари барча муҳим вақтларда, CS Trustʼдан ташқари, барча инвестицияларни бошқариш ваколатлари учун жавобгар бўлган ва буни амалга оширган», деб айтди.
Уларнинг сўзларига кўра, бўлинма Иванишвилининг сармояси учун яратилган Mandalay Trust активларини ҳимоя қилиш ва сақлаш бўйича ҳеч қандай оқилона чоралар кўрмаганини рад этади. Credit Suisseʼнинг ўзи жорий суд ишларига изоҳ бермаслигини маълум қилди.
Бермуд ороллари ва Сингапурга инвестиция қилинган маблағлар бир-бирига ўхшаб кетади ва иккала юрисдикциядаги қонунлар Иванишвилига Сингапурлик айбланувчилардан 800 миллион долларни тўлиқ талаб қилишига тўсқинлик қилади.
Грузияни Сингапурлик Кавиндер Булл (Drew & Napier LTD) бошчилигидаги жамоа, CS Trustʼни эса Афзал Али бошчилигидаги Alllen & Gledhill LLP жамоаси ҳимоя қилади.
Иванишвили Forbesʼнинг доимий янгилаб туриладиган Real-Time рейтингида Грузиянинг энг бой тадбиркори бўлиб турибди. Иванишвилининг бойлиги 4,8 миллиард долларга баҳоланади.
Иванишвили 2011 йилда мухолифат партиясини тузиб, бир йилдан кейинги сайловларда ғалаба қозонган ҳамда бош вазир лавозимини эгаллаган. 2013 йил ноябрда эса сиёсатдан кетган.