Ўзбекистонда фойдаланилмаётган объектларга нисбатан оширилган солиқлар натижасида ҳосил бўлган қарзлар ҳисобдан чиқарилади. Бу ҳақда 2022 йил 9 сентябрь куни «Таъсирчан солиқ механизмини қўллаш натижасида ҳосил бўлган солиқ қарзини ҳисобдан чиқариш тўғрисида»ги Президент фармонида сўз боради.

Фармонга кўра, фойдаланилмаётган объектлар мулкдорларига нисбатан оширилган ставкаларда қўлланилган таъсирчан солиқ механизми натижасида ҳосил бўлган мол-мулк солиғи ва ер солиғи бўйича:

• мавжуд солиқ қарзи ҳисобдан чиқарилади;
• солиқ қарзини ундириш билан боғлиқ суд ва ижро ишлари тугатилади.

Хабарга кўра, 2022 йил 1 июлдан мазкур фармон кучга киргунга қадар бўлган даврда таъсирчан солиқ механизмини қўллаш натижасида ундирилган солиқ келгуси тўловлар ҳисобига  мулкдорларга қайтарилади.

Эслатиб ўтамиз, аввалроқ Шавкат Мирзиёев тадбиркорлар билан учрашуви давомида бўш бино, фойдаланилмаётган ер участкасига нисбатан мол-мулк ва ер солиқларининг оширилган ставкаларини қўллаш бўйича аввал ошириб ҳисобланган 2 триллион сўмлик солиқ қарзларидан воз кечишни таклиф қилганди.

Маълум бўлишича, 2022 йил 1 июлдан бошлаб бўш бино, фойдаланилмаётган ер участкасига нисбатан мол-мулк ва ер солиқларининг оширилган ставкаларини қўллаш бекор қилинган. Лекин 19 минг нафар тадбиркорда бундан аввал ошириб ҳисобланган солиқлар бўйича қарздорлик бўлган. Таъкидланишича, мазкур масала юзасидан кўплаб мурожаатлар ҳам келиб тушган.

«Шуларни инобатга олиб, тадбиркорларнинг оширилган солиқ ставкалари бўйича ҳисобланган 2 триллион сўмлик қарзларидан бутунлай воз кечсак, нима дейсизлар?» — дея тадбиркорларга мурожаат қилганди Президент.