Прогнозлаштириш ва макроиқтисодий тадқиқотлар институти (ПМТИ) иқтисодий тараққиётни баҳолаш учун муқобил кўрсаткичлардан фойдаланди. Интститут матбуот хизмати Kommers.uz’га таҳилий материални тақдим этди.

Норасмий иқтисодиётнинг улуши юқори бўлган мамлакатларда расмий статистик манбалардан фойдаланиш янглиш хулосаларга олиб келиши мумкин. ЯИМ, кўрсатилган хизматлар ҳажми, чакана савдо айланмаси каби қатор иқтисодий кўрсаткичлар фақат расман рўйхатдан ўтган субъектлар топширган ҳисоботлар асосида шакллантирилиши сабабли уларнинг ишончли экани шубҳа остида қолади.  

Тунги чироқларнинг фазовий тасвири (NTL — Nighttime lights) минтақаларнинг иқтисодий кўрсаткичлари ҳамда турли ташқи шокларнинг иқтисодий таъсирини баҳолашда фойдаланиладиган машҳур маълумот тури ҳисобланади. NTL мамлакат ҳудудлари аҳолиси, унинг зичлиги, ишлаб чиқариш кучларининг жойлашуви, пировардида, малакат ҳудудларининг иқтисодий фаол қисми ҳақида тасаввурни шаклланитиришда ёрдам беради.

Марказий Осиёдаги вазият

Сунъий йўлдошдан олинган тунги ёруғлик тасвирини 63 хил рангда қайта ифодалаш натижалари шуни кўрсатмоқдаки, 2021 йил декабрь ойида тунда ёритилганлик даражаси 2016 йилнинг мос давридагига нисбатан Қирғизистонда 11,8 фоиз, Қозоғистонда 15,5 фоиз, Ўзбекистонда 47,2 фоиз, Туркманистонда 37,5 фоиз ва Тожикистонда 64,4 фоизга ортган. 

Шунингдек, 2021 йилда ЯИМ 2016 йилдагига қараганда Қирғизистонда 7,8 фоиз, Қозоғистонда 14,9 фоиз, Ўзбекистонда 27,3 фоиз, Туркманистонда 35,2 фоиз  ва Тожикистонда 41,1 фоизга ортган.

Кузатувлар шуни исботладики, тунги ёруғлик даражаси мамлакатларнинг иқтисодиёти кўлами билан мос тушади. Хусусан, ўрганилган 5 та мамлакат орасида Қозоғистон ЯИМ бўйича етакчи ва ёруғлик даражаси энг юқори (DN — NTL маълумотларининг рақамли қиймати = 9907701,5 пиксел) ҳисобланади. 

Кейинги ўринларни Ўзбекистон ва Туркманистон эгаллайди, ёруғлик даражаси DN = 1809744,8 ва 1774334,1 пикселни ташкил этади. Қирғизистон ва Тожикистон ЯИМ ҳажми бўйича ҳам, тунги ёруғлик даражаси бўйича ҳам охирги ўринлардан жой олади.

Ўзбекистондаги вазият

Республика ҳудудлари орасида Хоразм, Фарғона ва Самарқанд вилоятларида ёруғлик даражаси 2016-2021 йилларда 1,9-3,6 бараваргача ортган. 

Ёруғлик даражасининг энг кам ўзгариши Қашқадарё вилоятида кузатилди (0,8 фоиз). Вилоят ЯҲМ ҳажми бўйича ҳам ҳудудлар орасида энг кам ўсиш (18,9 фоиз) кўрсаткичига эришган.