Туркияда «Мир» карталаридан фойдаланадиган банк қолмагани сабабли норозилик намойишлари бошланди
Туркияликлар АҚШ санкцияларини бузмаган ҳолда Россия билан молиявий операцияларни амалга оширишнинг муқобил йўлларини қидирмоқда
Анталияда бўлиб ўтган митингда намойишчилар «ʼМирʼ карталарини тинч қўйинглар, Россия билан савдо давом этиши керак», деган норозилик шиорлари билан чиқишди.
Қайд этилишича, Туркияда Россиянинг «Мир» карталарини қабул қилишнинг тўхтатилиш қароридан кейин нафақат россиялик сайёҳлар, балки туризм соҳасида фаолият кўрсатувчи турк фуқаролари ҳам зарар кўришни бошлаган. Уларнинг зарарлари ҳозирда ўртача 80 фоизни ташкил қилмоқда.
Шунингдек, Туркияда «Мир» тўлов тизими билан ишлаш учун янги банк очилиши мумкин, дея хабар берди «Спутник».
Бу тахминни Россия-Туркия ишбилармонлар кенгаши директори Алексей Егармин илгари сурди. Унинг сўзларига кўра, Туркия томони «Мир» тизими билан молиявий операцияларни амалга оширишнинг муқобил вариантларини, хусусан, АҚШ ва Европа Иттифоқининг санкцияларига боғлиқ бўлмаган банк яратишни кўриб чиқмоқда.
«Эҳтимол, бу махсус банк ёки блокчейн ҳисоб-китобларга асосланган махсус тизим ёки ёпиқ клиринг бўлиши мумкин», дейди Алексей Егармин.
Аввалроқ, АҚШ ва Европа Иттифоқи Россиянинг «Мир» тўлов тизими билан ишлайдиган банкларга огоҳлантириш билан чиққанди. Унда Россияга нисбатан амалга оширилган иқтисодий санкциялар кўзланган натижасини бермагани, шу сабабли Ғарб давлатлари аввал жорий қилинган чекловларни кучайтириш ниятида эканлиги маълум қилинганди.
