“Milliy tiklanish” demokratik partiyasi yetakchisi Alisher Qodirov Oʻzbekistonda fuqarolar xuddi mobil aloqa operatorlarini tanlagani kabi elektr energiyasini yetkazib beruvchi kompaniyani ham tanlashi mumkin boʻlishini aytdi. Bu haqda u “Energetika toʻgʻrisida” qonunning partiya fraksiyasidagi 8-iyul kuni boʻlib oʻtgan navbatdagi muhokamasida gapirgan.

Qonun loyihasi partiya fraksiyasi tomonidan ikkinchi oʻqishda maʼqullangan. Ushbu qonun bilan Oʻzbekiston energetika bozorida monopoliya bekor qilinishi va elektr energiyasi ishlab chiqaruvchi hamda sotuvchi kompaniyalar faoliyat yurita boshlashi koʻzda tutilgan.

Bu haqda Alisher Qodirov Oʻzbekitonda odamlar mobil aloqa operatorlarini tanlaganidek, elektr energiyasi yetkazib beruvchi kompaniyalarni ham tanlashi mumkin boʻlishi va sohada raqobat vujudga kelishini taʼkidladi.

“Oʻzbekiston qonunchiligi shu bugungacha bu narsani qilish imkoniyatini bermas edi. Oʻzbekistonda bu sohada monopoliya bor edi. Monopolist tashkilot bizga xohlagan narxida elektr energiyasini berar va pulini sanab olar edi… Mazkur qonun bilan biz bularning barchasini ochiq bozor tartibiga olib kelyapmiz”, – deydi u.

Muhokama qilinayotgan qonun loyihasida elektr energiyasini ishlab chiqarish, uzatish, taqsimlash, saqlash, elektr energiyasi bilan taʼminlash, markaziy xaridorning funksiyalarini bajarish, elektr energiyasi savdosi, importi va eksporti litsenziya asosida amalga oshirilishi belgilab qoʻyilmoqda.

Shuningdek, unda energetika bozori ishtirokchilarining maqomi, huquqlari, majburiyatlari va javobgarligi aks etadi. Elektr energiyasi bozorini tashkil etishga oid qoidalar, elektr energetikasi sohasida tariflarni shaffof tamoyillar asosida shakllantirish tartiblari nazarda tutiladi.