Starbucks O‘zbekistonda yana ro‘yxatdan o‘tmoqda
Starbucks kompaniyasi 2024-yilning 18-noyabrida O‘zbekistonda o‘z tovar belgisini qayta ro‘yxatdan o‘tkazish uchun ariza topshirdi. Brend 1997-yilda ro‘yxatdan o‘tgan bo‘lsa-da, mamlakatda hozirgacha birorta filiali ochilmagan. Starbucksning moliyaviy ahvoli va bozor sharoitlari bu qaror yuzasidan ko‘plab savollarga sabab bo‘lmoqda.
Starbucks kompaniyasi O‘zbekistonda o‘z tovar belgisini qayta ro‘yxatdan o‘tkazish uchun Intellektual mulk agentligiga ariza topshirdi. Ushbu ariza 2024-yil 18-noyabrda berilgan. E’tiborli jihati shundaki, Starbucks 1997-yilda ham o‘z tovar belgisini O‘zbekistonda ro‘yxatdan o‘tkazgan, biroq shu paytgacha mamlakatda bu brendning birorta ham filiali ochilmagan.
Shuningdek, 2022-yilda Starbucksning O‘zbekistonda birinchi filiali ochilishi mumkinligi haqidagi ma’lumotlar tarqalgan, hatto uning joylashuv manzili ham aniq bo‘lgan edi. Ammo, bu xabarlar hozirga qadar tasdiqlangani yo‘q.
Bir qator restoran biznesi mutaxassislari O‘zbekistonda Starbucks kabi tarmoqlarni ochish iqtisodiy jihatdan samarasiz ekanini ta’kidlashgan. Bundan tashqari, 2018-yilda Vazirlar Mahkamasi O‘zbekistonda McDonald’s, Starbucks va Burger King restoranlarini ochish bo‘yicha qaror qabul qilgan bo‘lsa-da, amalda bu loyiha hali hayotga tatbiq etilmagan.
Yana shuni ta’kidlash joizki, Starbucksning so‘nggi moliyaviy ko‘rsatkichlari ham kompaniyaning O‘zbekiston bozoriga kirish qarorini murakkablashtirishi mumkin. 2024-yilning to‘rtinchi choragida Starbucksning sof foydasi 909,3 million dollarni tashkil etdi, bu o‘tgan yilga nisbatan 25 foiz kamdir. Kompaniya savdolari ketma-ket uchinchi chorakda pasayib, Xitoyda savdo hajmi 14 foizga qisqargan. Starbucks bu pasayishni talab darajasining tushishi bilan izohladi.
