«Ўзсаноатқурилишбанк» томонидан стартап лойиҳаларни молиялаштириш ва инновацион ғояларни қўллаб-қувватлаш мақсадида венчур молиялаштириш хизматларини кўрсатувчи SQB Ventures компанияси фаолияти йўлга қўйилди. Бу ҳақда банк матбуот хизмати хабар берди.

Президент раҳбарлигида 2024 йил декабрь ўрталарида ўтказилган видеоселектор йиғилишида давлат банклари маҳаллалардаги стартап лойиҳаларини рағбатлантириш мақсадида венчур компаниялар тузиши, мазкур компаниялар орқали умумий ҳисобда 50 млн АҚШ доллари миқдорида маблағ йўналтириши белгиланган эди. Шунингдек, ҳар бир банк хусусий шерик топиб, стартапларни бизнесга айлантирадиган акселераторлар фаолиятини йўлга қўйиши кўзда тутилган.

Ташаббус натижасида ноёб бизнес ғояларга эга, лекин етарлича маблағи бўлмаган кўплаб ёшлар ва тадбиркорларнинг стартап лойиҳалари ҳаётга тадбиқ этилади. Бунда нафақат молиявий хизмат кўрсатиш, балки лойиҳани ишлаб чиқиш, ишбилармонлик стратегиясини тўғри йўналтириш, бозорга кириб бориш каби масалаларда кўмаклашилади.

SQB Ventures масъулияти чекланган жамияти банкнинг SQB Capital шуъба корхонаси таъсисчилигида ташкил этилди. Унинг устав капитали маъқулланган лойиҳаларга қараб босқичма-босқич шакллантириб борилади.

Бундан ташқари, 2024 йил охирида «Алоқабанк»нинг кузатув кенгаши Aloqa Ventures-2’ни ташкил этиш тўғрисида қарор қабул қилди. Шўба компаниялар ва аффилланган шахслар рўйхатига ўзгартиришлар киритиш тўғрисидаги муҳим фактлар 30 январь куни Корпоратив ахборот ягона порталида эълон қилинди.

Бу давлат банкининг иккинчи венчур фонди бўлиб, биринчи фонд — Aloqa Ventures 2021 йилда ташкил этилган.

Венчур фонди — молиявий муассаса бўлиб, бу каби ташкилот стартапларга пул ажратади. Фонд маблағни инвесторлардан (давлат, банк, инвестиция фонди ёки жисмоний шахс) жалб қилади.