Ўзбекистоннинг олтин-валюта захиралари кўпайди
Регулятор захираларидаги активларнинг умумий қиймати бир ойда 1,73 млрд долларга ошиб, 42,9 млрд долларни ташкил этган.
Ўзбекистоннинг халқаро захиралари январь ойида 1,73 миллиард долларга кўпайди. Бу ҳақда Марказий банк маълумотларида сўз боради.
1 февраль ҳолатига кўра, регулятор захираларидаги активларнинг умумий қиймати бир ойда 1,73 миллиард долларга ошиб, 42,9 миллиард долларни ташкил этган.
Олтин захиралари қиймати 3,02 миллиард долларга — 32,03 миллиард доллардан 35,06 миллиард долларгача ошиб, рекорд кўрсаткичини янгилаган. Унинг физик ҳажми 12,6 миллион трой унция (391,9 тонна) ошган.
Ўтган ойда Ўзбекистоннинг валюта захиралари 1,3 миллиард долларга камайган. Уларнинг ҳажми 7,3 миллиард долларни, шу жумладан, бошқа мамлакатлар марказий банклари ва ХВЖдаги ҳисоб рақамларида 442,3 миллионни ҳамда хорижий банкларда 6,75 миллиард долларни ташкил этмоқда.
Бундан ташқари, Марказий банк томонидан сотиб олинган қимматли қоғозлар қиймати бир ой ичида бироз ошган — 102,1 миллион доллар.
Жаҳон олтин кенгаши ҳисоботига кўра, Ўзбекистон 2024 йилда дунёнинг энг йирик олтин харидорлари ўнталигига кирган. Марказий банкнинг соф олтин хариди ҳажми 11 тоннани ташкил этган. Мамлакатда олтин ишлаб чиқариш ОКМК ва НКМКда қазиб олиш ҳажмининг ошиши ҳисобига 8 фоизга ўсган.
