Anorbank Энергетика вазирлиги ва «Ўзтрансгаз» биноларини қарийб 440 млрд сўмга сотиб олди
Ҳар икки олди-сотди шартномаси январь ойида тузилган. Ушбу бинолар у ерда ўтирган идоралар Янги Тошкентга кўчиши сабаб сотилгани айтилмоқда.
Anorbank Тошкент марказида жойлашган Энергетика вазирлиги ва «Ўзтрансгаз» давлат компаниясининг биносини қарийб 440 миллиард сўмга сотиб олди. Бу ҳақда Корпоратив ахборот ягона порталида сўз боради.
2025 йил 27 январь куни тузилган битимга кўра, Anorbank АЖ Тошкент шаҳри Истиқлол кўчаси 21 уйда жойлашган бино-иншоотларни 254,6 миллиард сўмга харид қилган. Ушбу манзилда Ўзбекистон Энергетика вазирлиги жойлашган.
Кўчмас мулк объекти «Ўзбекнефтегаз» АЖнинг кўп қаватли уйлар ижраси ва бошқаруви билан шуғулланадиган шуъбаси Neft Gaz Bino Inshoat МЧЖ балансида бўлган.
27 январь куни Anorbank ва Neft Gaz Bino Inshoat 254,6 миллиард сўмлик (19,64 млн доллар) олди-сотди шартномасини тузган. 10 январь куни эса Anorbank Шаҳрисабз кўчаси 85А-уйда жойлашган «Ўзтрансгаз» биносини харид қилган. Шу куннинг ўзида 185,03 миллиард сўмлик олди-сотди шартномаси имзоланган.
Мазкур янгиликка биринчилардан бўлиб эътибор қаратган иқтисодчи Отабек Бакировнинг ёзишича, биноларнинг сотилишига уларнинг Янги Тошкентга кўчиши сабаб бўлган.
