
Хорижда ўқиш учун кимларга ссуда берилади
Календарь йили давомида ссуда дастур иштирокчиларидан ариза топширган ва белгиланган талабларга мос келган 2 000 нафарига берилади.

Вазирлар Маҳкамасининг қарори билан Work and travel халқаро дастурларида иштирок этувчи талаба ёшларнинг ишлаш ва саёҳат қилиш мақсадида хорижий давлатларга бориши ва келиши билан боғлиқ харажатлар учун ссуда ажратиш бўйича давлат хизматларини кўрсатишнинг Маъмурий регламенти тасдиқланди.
БҲМнинг 40 баравари миқдорида фоизсиз ссуда олувчи бўлиб 16 ёшдан 30 ёшгача бўлган, Ўзбекистондаги олий ўқув юртида таҳсил олаётган ва Work and Travel дастури доирасида хорижий давлатга бориш ва ишлаш билан боғлиқ харажатлар учун ссуда олишга ариза берган жисмоний шахс — Ўзбекистон Республикаси фуқароси бўлиши мумкин.
Календарь йили давомида ссуда дастур иштирокчиларидан ариза топширган ва белгиланган талабларга мос келган 2 000 нафарига берилади. Ссуда Ёшлар ишлари агентлигининг Ёшларга оид давлат сиёсатини қўллаб-қувватлаш жамғармаси маблағлари ҳисобидан молиялаштирилади.
Регламентда ҳужжатларни кўриб чиқиш, ссуда ажратиш ва қайтариш тартиби назарда тутилган.
Номзодлар аризаларни давлат хизматлари маркази ёки Ягона интерактив давлат хизматлари портали орқали топширадилар.
Ҳужжат Қонун ҳужжатлари маълумотлари миллий базасида эълон қилинган ва 5 майдан кучга кирди.
Ссуда — бир томон (қарз берувчи) иккинчи томонга (қарз олувчи) маълум муддатга фойдаланиш учун пул, мол-мулк ёки бошқа активларни беришидир. Белгиланган муддат тугагач, қарз олувчи олинган маблағни тўлиқ ҳажмда ёки қўшимча тўлов (фоиз) билан қайтариши шарт.




