Ўзбекистонда чакана савдо қоидаларига ўзгартиришлар киритилди. Бу Вазирлар Маҳкамасининг 21 октябрдаги қарорида назарда тутилган.

Ҳужжатга кўра, сотувчи акция ёки чегирма пайтида нархларни сунъий равишда ошириб, кейинчалик уларни чегирма сифатида тақдим этиш орқали истеъмолчиларни чалғитиши мумкин эмас.

Истеъмолчиларнинг қизиқишини ошириш, савдони кўпайтириш ёки бошқа мақсадларда акциялар ва чегирмаларга рухсат берилади, алкоголь, пиво ва вино маҳсулотлари, тамаки маҳсулотлари ва никотинли қурилмалар бундан мустасно.

Чегирмадан олдинги нарх чегирма эълон қилинишидан олдинги охирги 30 кун ичида энг паст бўлиши керак (қишлоқ хўжалиги маҳсулотлари бундан мустасно).

Сотувчи қуйидагиларга мажбур:

• чегирмани аниқ фоиз ёки сумма шаклида белгилаши ҳамда товар нархи осон аниқланиши ва аниқ ўқилишини таъминлаш;
• ҳар бир товар учун чегирма нархгача бўлган нарх тўғрисида аниқ маълумот тақдим этиш (истеъмолчи талабига кўра);
• агарда чегирма нархда сотилиши назарда тутилган товар сони чекланган ёки мавсумий ёхуд маҳсулотларининг ҳолатига боғлиқ бўлса (хизмат қилиш муддати ёки яроқлилик муддати яқинлашган, бут бўлмаган, мавсумий сотиш, эски захираларни тугатиш, қадоқлашнинг шикастланиши ёки бошқа сабаблар), бу ҳақда истеъмолчиларни хабардор қилиш;
• чегирма нархнинг амал қилиш муддатини (бошланиш ва тугаш санаси) аниқ кўрсатиш, агар чегирма нарх фақатгина муайян шароитларда қўлланса, бу шароитларни олдиндан маълум қилиш.

Агар чегирма олиш учун шахсга доир маълумотларни тақдим этиш талаб этилса, сотувчи қонун ҳужжатларига риоя этиши ва истеъмолчини уларга ишлов бериш мақсадлари ва шартлари тўғрисида хабардор қилиши шарт.

Сотувчи ҳисоб юритиши ва истеъмолчининг талабига кўра сўнгги 30 кун ичида амалда бўлган нархлар тўғрисида маълумот тақдим этиши шарт.

Лойиҳада акция ёки чегирма тўғрисидаги маълумот уни ўтказишдан 10 кун олдин солиқ органларига тақдим этилиши режалаштирилган эди, бироқ якуний ҳужжатга бу норма киритилмаган. Рақобат қўмитаси бўлса ушбу банд киритилганини маълум қилди.