Ўзбекистон ҳукумати қиймати кескин ошган ижтимоий аҳамиятга эга товарлар нархини барқарорлаштиради. Бу ҳақда 24-октабр куни бўлиб ўтган матбуот анжуманида Марказий банк бошқаруви раиси Тимур Ишметов маълум қилди.

Ишметов аҳоли кундалик ҳаётда кўп истеъмол қиладиган ижтимоий аҳамиятга эга товар ва хизматлар нархларининг йиллик ўсиши центабр ойида 8% гача секинлашган умумий инфляциядан сезиларли даражада баланд қолаётганини қайд этди. Хусусан, йил давомида мол гўшти 23,2% га, картошка 18,5% га ва бензин 11,8% га қимматлашган.

«Ушбу маҳсулотлар таклифини ва нархларини барқарорлаштириш бўйича тегишли вазирлик ва идоралар билан биргаликда амалий чоралар кўрилмоқда», — деди у.

Бундан ташқари, келгуси йилларда инфляциянинг паст даражада барқарор шаклланишини таъминлаш учун инфляциянинг таклиф билан боғлиқ фундаментал омилларини бартараф этиш зарурлиги таъкидланди.

Бунинг учун биринчи навбатда ички бозорда рақобатни кучайтириш, тариф ва нотариф чекловларни камайтириш, товарлар импортида концентрациялашув даражасини пасайтириш чораларини кўриш зарурлиги айтилди.

Шу билан бирга, товар ва хизматлар таклифини оширишни таъмилашда энергия ресурсларини етказиб бериш узлуксизлиги ва етарли даражада транспорт инфратузилмаси потенциалини шакллантириш каби чора-тадбирлар эълон қилинди.

Марказий банк прогнозига кўра, 2026 йил охирига келиб инфляция 7% гача секинлашади. Ташқи инфляцион босимнинг пасайиши ва инфляцион кутилмаларнинг барқарорлашиши натижасида 2027 йилда инфляциянинг 5 фоизлик таргет даражасигача пасайиши, 2028 йилдан эса таргет атрофида сақланиб қолиши кутилмоқда.

Центабр ойида Марказий банк инфляция инфографигини эълон қилганди: йиллик кўрсаткич 8% ни ташкил этди — бу 2022 йилдан бери энг паст кўрсаткич. 10% дан ортиқ қимматлашган товарлар улуши 14% гача пасайди (август ойида — 18%).

Озиқ-овқат маҳсулотларида 86% саватлар 10% дан кам нархга қўшилган. Шу билан бирга, хизматларнинг тахминан ярми 10% га ва ундан юқорига ошди. Йиллик нархлар ўсиши бўйича Топ-5 товар ёки маҳсулот ҳайдовчилик курслари (+73,3%), сабзи (+57,5%), ички авиақатновлар (+57,3%), лимон (+52,5%) ҳамда тармоқ гази (+39,2%) бўлди.