Ўзбекистонда йиллик инфляция 7,8 фоизга тушиб, ўтган йилга нисбатан 2,4 фоиз пунктга пасайди. Бу ҳақда Миллий статистика қўмитаси томонидан эълон қилинган истеъмол нархлари индексида маълум қилинган.

Маълумотларга кўра, 2025 йил октябрь ойида ойлик инфляция 0,6 фоизни ташкил этиб, сентябрь ойидаги даражада шаклланди.

Нархларнинг ўсиш суръати 2024 йилнинг октябрига нисбатан бир баравардан ортиққа пасайган, ўшанда бу 0,8 фоиз эди.

Жорий йилнинг январь—октябрь ойларида инфляция 5,7 фоизни ташкил этган. Йиллик инфляция октябрь ойида 7,8 фоиз даражасида қайд этилиб, ой давомида 0,2 фоизга, ўтган йилнинг октябрига нисбатан эса 2,4 фоизга пасайган.

Мева ва сабзавот маҳсулотлари нархи ўзгаришини ҳисобга олмаганда, инфляция октябрь ойида 0,5 фоизни, йиллик нисбатда эса 8,6 фоизни ташкил этган.

Ой давомида асосий маҳсулотлардан тухум (4,1%), суякли мол гўшти (1,7%), сут (1,2%) ҳамда ўсимлик ёғи (0,8%)нинг нархлари ошган. Бундан ташқари, асосий мева-сабзавотлардан помидор — 61,%, бодринг — 58,2%, бақлажон — 11,3% ҳамда булғор қалампири 10,6% га сезиларли қимматлаган.

Ноозиқ-овқат маҳсулотлари ой давомида 0,4% га, йил бошидан — 4,4%, ўтган йилнинг октябрига нисбатан эса 5,8% га қимматлади. Хизматлар бир ойда 0,3% га, йиллик ҳисобда эса 8,7% га ошган.

Ҳудудлар кесимида энг юқори ойлик инфляция Андижон (0,9%)да кузатилган бўлса, еттида ҳудуд — Бухоро, Навоий, Наманган, Самарқанд, Сурхондарё, Сирдарё ҳамда Тошкент вилоятларида энг паст — 0,5% ни ташкил этган.

Шу билан бирга, январь—октябрь ойларида нархлар энг кўп Қорақалпоғистон ва Фарғонада (6,2%), энг кам Тошкент шаҳрида (5,1%) ошди. Йиллик инфляция эса Фарғона вилоятида энг юқори бўлди — 8,6%. Нархлар энг кам Жиззахда (7,1%) кўтарилган.