Марказий банк учта янги микрокредит ташкилотини рўйхатдан ўтказди. Бу ҳақда регулятор матбуот хизмати хабар берди.

Банк назорати қўмитасининг қарорларига (27/5, 27/6, 27/9) кўра, Fincom Invest, Vafo Moliya ва Qanot Finans МЧЖлари рўйхатга киритилди.

КТЙДРдан олинган маълумотларга кўра, Fincom Invest жорий йилнинг август ойида 2 млрд сўм устав капитали билан ташкил этилган. Ягона таъсисчи сифатида Станислав Ким кўрсатилган бўлиб, у Fincom, Soft Leasing ва Universal Financial Service Leasing лизинг компанияларининг, шунингдек K-Unity компаниясининг 85% и ва Меҳнат тўқимачилик корхонасининг 50% лик улуши эгасидир.

Qanot Finans компанияси июль ойида таъсис этилган, 2 млрд сўмлик устав фондига эга. 70% улуш Боғибек Мингларович Матмуродовга тегишли, қолган 30% и эса Дилмурод Агрофирм компаниясининг ягона таъсисчиси Дилмурод Боғибек ўғли Матмурадовга қарашли.

Vafo Moliya январь ойида рўйхатдан ўтган ва 2,2 млрд сўм устав капиталига эга. Компания таъсисчиси Фируза Артиқова Wafa Leasing фирмасининг ҳам ягона эгасидир.

Ўтган ҳафта Банк назорати қўмитаси Бухоро Дарвозаси микромолия ташкилотини рўйхатдан чиқарганди. Ҳозир Ўзбекистонда жами 129 та микрокредит ташкилоти мавжуд.