Марказий банк келгуси йилда хориждан Ўзбекистонга пул ўтказмалари 10 фоизгача ошишини кутмоқда. Бу ҳақда Пул-кредит сиёсатининг 2026 йил ва 2027−2028 йиллар даврига мўлжалланган асосий йўналишларининг дастлабки концептуал лойиҳасида келтирилган.

Жорий йилнинг 9 ойида мамлакатга чет элдан пул ўтказмалари 24 фоизга ошиб, $13,9 млрдни ташкил этганди. 2023 йилга нисбатан эса кўрсаткич 66 фоизга ($5,5 млрд) ўсган.

Регулятор ўсишни меҳнат муҳожирларини қабул қилувчи мамлакатлар валютасининг мустаҳкамланиши, юқори иқтисодий фаоллик ҳамда ишчи кучига бўлган барқарор талаб билан изоҳлади.

2026 йилда жорий ва ўтган йиллардаги юқори база фонида пул ўтказмалари 6−10 фоизга, ўрта муддатли даврда эса 8−12 фоизга ўсиши прогноз қилинмоқда.

Пул ўтказмалари ҳажми ўсишининг ўрта муддатли тренд доирасида шаклланишига меҳнат мигрантларини қабул қилувчи асосий давлатлар валюталари курсларининг кутилаётган динамикаси, ишчи кучига бўлган юқори талаб ҳамда географик диверсификация асосий омил бўлиши кутилмоқда.

Биринчи ярим йилда Ўзбекистонга пул ўтказмалари 27 фоизга ошиб, $8,2 млрдга етган. Бунда кўрсаткич ўтган йилнинг мос даврига нисбатан $1,8 млрдга кўпайиб, $8,2 млрдни ташкил қилганди.

Маблағларнинг 78%и — $6,4 млрди Россия ҳиссасига тўғри келади. Қолган қисми эса Қозоғистон, АҚШ, Жанубий Корея, Туркия, Буюк Британия, Қирғизистон, Литва ҳамда бошқа мамлакатлардан жўнатилган.