Ўзбекистонда давлат тили ва ошкоралик талаблари бузилгани учун 18 та банк 102 миллион сўмдан жаримага тортилди. Бу ҳақда Марказий банк матбуот хизмати хабар берди.

Маълум қилинишича, Марказий банк томонидан 2025 йил сентябрь–октябрь ойларида тижорат банкларининг расмий веб-сайтлари мониторингдан ўтказилди. Мониторингнинг асосий мақсади — молиявий хизматлар истеъмолчилари учун ахборотлар ошкор этилиши бўйича қонунчилик талабларига риоя этилишини ҳамда фойдаланувчиларнинг тўлиқ ва ишончли маълумот олиш ҳуқуқи таъминланишни текширишдан иборат бўлди. Мониторинг натижасида қатор камчиликлар ва қонунбузилиш ҳолатлари аниқланган.

Жумладан, «Ўзбекистон Республикасининг Давлат тили ҳақида»ги қонун талабларига риоя этилмасдан айрим банкларнинг веб-сайтларида маълумотлар давлат тилида жойлаштирилмагани аниқланди. Бундан ташқари, ахборотларни ошкор этиш бўйича қонунчилик талабларига риоя этилмаган ҳолда айрим банкларнинг веб-сайтларида кредит таъминотига қабул қилинган гаров мулкларини кредитнинг асосий қарзи қолдиғига мутаносиб равишда босқичма-босқич гаровдан чиқариш тартиби жойлаштирилмагани маълум бўлди.

Хусусан, Агробанк, Анор банк, Ҳаёт банк, Универсал банк, Гарант банк, Асакабанк, Туронбанк, Инфинбанк, Микрокредитбанк, Трастбанк, Мадад Инвест банк, Soderot bank, Orient Finance bank, Ипотека-банк, Тенге банк, Ziraat bank Uzbekistan, AVO банк ва Open банк каби банкларнинг расмий веб-сайтларида юқорида қайд этилган тартиб жойлаштирилмагани кузатилган.

Мониторинг якунларига кўра Марказий банк томонидан қоидабузарликка йўл қўйган банкларнинг ҳар бирига нисбатан амалдаги норматив ҳужжатларга мувофиқ 102 миллион сўмдан жарима чораси қўлланилган. Аниқланган камчиликларни бартараф этиш ҳамда расмий веб-сайтлардаги маълумотларни қонунчилик талабларига тўлиқ мослаштириш бўйича тегишли кўрсатмалар юборилган.