Ўзбекистонда ишсизлик даражаси 2025 йилнинг III чорагига кўра 4,9 фоизни ташкил этди. Камбағалликни қисқартириш ва бандлик вазирлиги маълумотларига кўра, бу кўрсаткич 2024 йилнинг шу даврига нисбатан 0,8 пунктга камайган.

Мамлакатда жами аҳоли 37,8 миллион кишини ташкил этган бўлса, шундан:

• меҳнат ресурслари 20,35 миллион нафар (1,9 фоизга кўпайган);
• иқтисодий фаол аҳоли 15,57 миллион нафар;
• банд аҳоли 14,81 миллион нафар (4,1 фоизга кўпайган).

Расмий секторда банд бўлганлар 17 фоизга ортиб, 8,58 миллион кишини ташкил этди. Норасмий сектода ишлаётганлар эса 26,9 фоизга камайиб, 4,38 миллион кишини ташкил этди. Четга ишлашга кетганлар сони кўпайиб, 1,86 миллион кишини ташкил этди. Бу 2024 йилнинг шу даврига нисбатан 512 минг кишига кўп дегани.

Республика бўйича 760 минг киши ишга жойлашишга талабгор бўлган.

2025 йилда аҳолининг 4,45 млн нафари даромадли меҳнат билан таъминланган:

• қишлоқ хўжалигида — 1,29 млн
• хизмат кўрсатишда — 2,74 млн
• қурилишда — 172,3 минг
• инвестиция лойиҳалари орқали — 256,2 минг нафар.

Ўзбекистонда 2025 йилнинг иккинчи чорагида ишсизлик даражаси 5,1 фоизни ташкил этиб, МДҲ мамлакатлари орасида бу кўрсаткич бўйича учинчи ўринда қайд этилганди.

Вазирлик ахборотида қайд этилишича, ишсизлик даражаси бандлик сиёсати ва янги иш ўринлари туфайли камаймоқда.

Ўзбекистонда 2025 йил 1 ноябрдан бошлаб ишсизлик нафақаси фақат меҳнат шартномаси бекор қилинган шахсларга тўланадиган бўлди. Бу турдаги нафақани олиш учун фуқаро сўнгги беш йилда камида 18 ой ишлаган ва меҳнат шартномаси бекор қилин бўлиши керак. Шу билан бирга, нафақа юзасидан олти ой ичида мурожаат қилиши талаб этилади. Шундагича унинг охирги 18 ойлик ўртача иш ҳақи ҳисобидан уч ой давомида ишсизлик нафақа тўланади.