Адлия вазирлигида “Банк ҳисобварақларини очиш, юритиш ва ёпиш тартиби тўғрисидаги йўриқномага қўшимча ва ўзгартиришлар киритиш ҳақида”ги қарор давлат рўйхатидан ўтказилди.

Ушбу ҳужжат билан бир қатор янгиликлар белгиланди, жумладан:

Эндиликда мижозлар банкларда эскроу ҳисобварақларини очишлари мумкин (маълумот учун: бу ҳисобварақлар электрон тижоратда электрон савдо майдончалари орқали маҳсулотлар олди-сотдиси, улушли шартномалар бўйича ва бошқа соҳаларда битимлар тузишда қўлланилади).

Банк ҳисобварақларини очиш учун мижозлар шахсни тасдиқловчи ҳужжатларнинг ҳамда ўзини ўзи банд қилган жисмоний шахс тўғрисидаги маълумотноманинг ЯИДХП (my.gov.uz) ва/ёки «Ижтимоий карта» мобил иловаси орқали бериладиган электрон шаклини тақдим этишлари мумкин.

Норезидент жисмоний шахслар илгари тегишли банкда банк ҳисобварағини очган бўлса, ушбу банкда бошқа банк ҳисобварақларини масофадан туриб очиши мумкин.

14 ёшгача бўлган вояга етмаган шахсга ота-онадан бири ёки уларнинг ўрнини босувчи шахс (қонуний вакили) томонидан миллий ва чет эл валютасида депозит, металл ҳисобварақлар очиш мумкин.

14 ёшдан 18 ёшгача бўлган вояга етмаган шахслар миллий ва чет эл валютасида депозит, металл ҳисобварақларни мустақил равишда очишлари мумкин.