Ўзбекистон кўчмас мулк бозоридаги фаоллик ижобий даражада сақланиб қолмоқда, дейилади Марказий банк шарҳида.

Регулятор маълумотларига кўра, январь-центабр ойларида кўчмас мулк бозорида 274 мингта битим тузилди, бу ўтган йилнинг шу даврига нисбатан 11 фоизга кўпдир.

Шу билан бирга, бозорда ҳар ойда тузилган битимлар сони 2024 йилдаги кўрсаткичлардан ошиб кетди. Айниқса, июль ойида келишувлар сони қарийб 35 мингтага етганида кескин ўсиш кузатилди.

Иккиламчи уй-жой бозоридаги нархлар ушбу даврда миллий валютада 1,7 фоизга, АҚШ долларида эса 5 фоизга ошди. Таққослаш учун: 2023 йил якунларига кўра, сўмда нархлар 35,1 фоизга, долларда эса 23 фоизга ошган. 2024 йил якунларига кўра, уй-жой нархининг ўсиши сўмда 6,3 фоизга ва долларда 1,8 фоизга секинлашди.

Қайд этилишича, доллардаги ўсиш жорий йилда сўм алмашув курсининг мустаҳкамланиши билан боғлиқ. Тўққиз ой ичида доллар миллий валютага нисбатан 6,4 фоизга арзонлашди.

ИТИМ ҳисоб-китоблари

Иқтисодий тадқиқотлар ва ислоҳотлар марказининг маълум қилишича, тўққиз ойда уй-жой савдоси 212 мингга етган, бу 2024 йилнинг январь-центабрига (190,2 минг) нисбатан 11,5 фоизга кўпдир. МБ билан маълумотлар битимлар сони бўйича фарқ қилади.

Иқтисодий тадқиқотлар ва ислоҳотлар маркази маълумотларига кўра, республика бўйича иккиламчи уй-жой бозоридаги ўртача нархлар йиллик ҳисобда 4,6 фоизга ошган (аммо ўсиш суръати секинлашган, 2024 йилнинг тўққиз ойида йиллик ўсиш 6,7 фоизни ташкил этган).

Тошкент шаҳрида ҳам ой давомида иккиламчи уй-жой нархлари 0,6 фоизга ошди, бироқ 2024 йилнинг центабр ойига нисбатан 1,7 фоизга арзонлашди. Айниқса, Яшнобод, Мирзо Улуғбек ва Чилонзор туманларида пасайиш кузатилиб, ўртача 4,3 фоизни ташкил этди.

Бирламчи уй-жой бозорида нархларнинг йиллик ўсиши 3 фоизни ташкил этди, энг юқори ўсиш пойтахтнинг Миробод, Бектемир ва Яккасарой туманларида қайд этилди — ўртача 5,8 фоиз.