Ўзбекистоннинг 2024 йилдаги ялпи ички маҳсулоти қайта ҳисоблангач, $121 млрддан ошди. Бу ҳақда Миллий статистика қўмитаси матбуот хизмати хабар берди.

17 ноябрь куни Тошкентда ташкил этилган халқаро конференция ва матбуот анжуманида Миллий статистика қўмитаси раиси Беҳзод Ҳамраев янги аниқланган ҳажмларни акс эттириш мақсадида ЯИМни қайта ҳисоблаш натижалари борасида маълумот берди.

Якуний ҳисоб-китобларга кўра, 2024 йил якуни билан мамлакат ялпи ички маҳсулотининг номинал ҳажми амалдаги 1 454,6 трлн сўмдан 1 535,4 трлн сўм (80,9 трлн сўм) га ёки 5,6% га ортди. ЯИМ АҚШ доллари ҳисобида $115 млрддан $121,4 млрдга етди.

Шунингдек, қайта ҳисоблашдан сўнг, ўтган йилда аҳоли жон бошига ЯИМ ҳажми 41,3 млн сўмни ташкил этди. Давлат бюджети ижросининг тўлиқ қамрови таъминланиши натижасида 36,4 трлн сўм янги қўшилган қиймат аниқланди.

Саноат соҳаси бўйича ўтган йил учун қўшилган қиймат ҳажми 12,7 трлн сўмга ошди. Қишлоқ хўжалигида 5,6 трлн сўм, қурилишда 10,3 трлн сўм ва хизматлар соҳасида 16,3 трлн сўм миқдорида ялпи қўшилган қиймат қўшимча ҳисобланди.

Январь-сентябрь ойлари якунларига кўра, мамлакатнинг ялпи ички маҳсулоти ҳажми 1,3 квадриллион сўм ($108,73 млрд) дан ортиқни, реал ўсиш суръати эса 7,6% ни ташкил этди. Ўсиш суръати 2021 йилдан бери энг юқори даражада қолмоқда.