Ўзбекистон президенти Шавкат Мирзиёев 20 ноябрь куни «Уй-жой ва ипотека бозорини барқарор ривожлантириш чора-тадбирлари тўғрисида»ги фармонни имзолади.
Ҳужжатга кўра, 2040 йилгача қуйидагилар режалаштирилган:
- ҳар йили қуриладиган уй-жойлар сонини 2 бараварга ошириб, 421 мингта объектга етказиш;
- ипотека портфелини 10 баравардан зиёд — 56,7 млрд долларгача кўпайтириш;
- уй-жой фондидаги замонавий уй-жойлар улушини 50 фоизга етказиш;
- «Янги Ўзбекистон» массивлари қурилишини кенгайтириш ва аҳолининг яшаш шароитларини яхшилаш.
Қарорда уй-жой секторини банк томонидан молиялаштириш ва институционал инвесторларнинг маблағлари, шу жумладан ипотека кредитидан фойдаланиш орқали, шунингдек, урбанизацияни қўллаб-қувватлаш ва улушли қурилиш иштирокчиларининг ҳуқуқларини ҳимоя қилиш назарда тутилган.
Шунингдек, «Уй-жойнинг ягона ҳаётий цикли» тамойили асосида уй-жой қурилиши соҳасини ислоҳ қилиш ва уни амалга оширишдаги тўсиқларни бартараф этиш режалаштирилган.
Бундан ташқари, қуйидагиларни назарда тутувчи комплекс қурилишнинг янги модели жорий этилмоқда:
- қурилишга биринчи навбатда қурилиши тугалланмаган уй-жойлар ва саноат зоналарини жалб этиш;
- муҳандислик, транспорт ва ижтимоий инфратузилмани олдиндан яратиш;
- экологик материаллар ва энергия тежовчи технологиялардан фойдаланиш.
Комплекс қурилиш принципи қуйидагиларни назарда тутади:
- комплекс қурилиш дастурларини фақат очиқ ва батафсил ишлаб чиқилган режалар асосида тайёрлаш;
- комплекс қуриш учун ажратилган ер участкалари хусусийлаштириш дастурларига киритилиши, бошқа лойиҳалар учун фойдаланилиши ёки белгиланган мақсадини ўзгартириши мумкин эмас;
- ҳар бир лойиҳа бўйича фойдаланилаётган ер участкалари, кўчмас мулк объектлари ва уларнинг ҳуқуқ эгалари тўғрисида тўлиқ очиқ ахборот таъминланади;
- лойиҳаларни амалга ошириш минтақанинг келажакдаги ижтимоий эҳтиёжларини ҳисобга олган ҳолда комплекс ёндашувни қўллаган ҳолда олиб борилади;
- кўчмас мулк объекти мулкдорига унинг объекти жойлашган ер участкасига эгалик қилишнинг мутлақ ҳуқуқи (ижара ёки мулк ҳуқуқи) кафолатланади.
Қурилиш соҳасидаги барча янги меъёрий ҳужжатлар 2040 йилгача тасдиқланган Уй-жой ва ипотека бозорини ривожлантиришнинг асосий йўналишлари асосида ишлаб чиқилади.
