Ўзбекистонда октябрь ойи давомида уй-жой олди-сотди битимлари 12 фоизга ошиб, 27,1 мингтани ташкил этди. Бу 2023 йил августидан буён қайд этилган энг юқори кўрсаткич. Бу ҳақда Иқтисодий тадқиқотлар ва ислоҳотлар марказининг октябрь ойидаги Ўзбекистон уй-жой бозори динамикаси бўйича янгиланган таҳлилида айтилади.

Октябрь ойида уй-жой бозоридаги фаоллик ўсиши республиканинг барча ҳудудларида қайд этилди. Энг катта ойлик ўсиш Хоразм, Бухоро ва Тошкент вилоятларида кузатилиб, бу ҳудудларда уй-жой олди-сотди битимлари ўртача 26 фоизга кўпайди. Сурхондарё ва Сирдарё вилоятларида эса ўсиш мўътадил бўлиб, мос равишда тахминан 2 фоиз ва 4 фоизни ташкил этди.

Республика бўйича уй-жой олди-сотди битимларининг тахминан 30 фоизи Тошкент шаҳри ҳиссасига тўғри келади. Октябрь ойида пойтахтда савдо ҳажми ойлик ҳисобда 5,3 фоизга, йиллик ҳисобда эса 32 фоизга ошди.

Октябрь ойида иккиламчи уй-жой бозоридаги нархлар динамикаси бироз тезлашди. Бир ой ичида 1 квадрат метр учун ўртача нарх 2,4 фоизга ошди, центабрда бу кўрсаткич 0,6 фоиз бўлган эди. Ўтган йил октябрига нисбатан ҳисоблаганда, иккиламчи бозорда ўртача нарх 1 кв. метр учун 7,4 фоизга ўсган. Энг юқори ўсиш суръатлари Сурхондарё ва Наманган вилоятларида қайд этилди, бу ҳудудларда уй-жой нархлари тахминан 20 фоизга ошди.

Тошкент шаҳрида уй-жой ва ижара бозори

Октябрь ойида Тошкентда иккиламчи уй-жой бозорида нархлар деярли ўзгармасдан қолди, ўртача ўсиш 0,7 фоиз атрофида бўлди. Йиллик ҳисобда, ўтган йил октабр ойига нисбатан, пойтахтда иккиламчи уй-жой нархлари 1 фоизга пасайган. Энг сезиларли тушиш Мирзо Улуғбек ва Яшнобод туманларида қайд этилган, бу ерда ўртача нархлар тахминан 5 фоизга арзонлашган.

Пойтахтнинг бирламчи уй-жой бозорида эса аксинча, нархлар ўсиши кузатилмоқда. Октябрь ойида бир квадрат метр учун ўртача нарх йиллик ҳисобда 2,1 фоизга ошган. Энг юқори ўсиш Бектемир, Яшнобод, Миробод ва Яккасарой туманларида қайд этилган бўлиб, бу ҳудудларда нархлар ўртача 5,5 фоизга ўсган.

Октябрь ойида Тошкентда ўртача ижара ставкалари ўтган ой даражасида қолиб,1 кв.м учун 8,5 долларни ташкил этди. Энг юқори ижара нархлари пойтахтнинг марказий ҳудудлари Миробод, Яккасарой ва Мирзо Улуғбек туманларида сақланмоқда, бу ҳудудларда 1 кв. метр учун ўртача ижара ҳақи тахминан 10,2 долларни ташкил этади.

Шу билан бирга, ўтган йил октябрига нисбатан Тошкентда уй-жой ижара нархлари 1,6 фоизга ошган. Энг катта ўсиш Бектемир, Яшнобод ва Сергели туманларида қайд этилган, бу туманларда ижара нархлари ўртача 9 фоизга кўтарилган.

Эслатиб ўтамиз, январь-сентябрь якунларига кўра, Ўзбекистон кўчмас мулк бозоридаги битимлар сони 11 фоизга ошиб, 274 мингтага етди. Марказий банк маълумотларига кўра, иккиламчи уй-жой нархларининг ўсиши миллий валютанинг мустаҳкамланиши фонида сўмда 1,7 фоизни, долларда эса 5 фоизни ташкил этди.