Ўзбекистон Россия билан Жаҳон савдо ташкилотига аъзо бўлиш бўйича музокараларни деярли якунлади. Бу ҳақда президентнинг ЖСТ бўйича вакили Азизбек Урунов ўзининг LinkedInʼдаги саҳифасида маълум қилди.

Ўтган ҳафта Москвада Россия музокаралар гуруҳи билан учрашув ўтказилиб, унда Ўзбекистоннинг ЖСТга қўшилиши бўйича ҳал этилмаган масалалар муҳокама қилинди. Ўзбекистон томонидан Азизбек Урунов, Марказий банк раиси ўринбосари Аброр Мирзо Олимов, инвестициялар, саноат ва савдо вазири ўринбосари Хуррам Тешабоев ва Фармацевтика маҳсулотлари хавфсизлиги маркази директори Алишер Темиров иштирок этди.

«Музокаралар деярли якунланди: барча муҳим элементлар мувофиқлаштирилди ва якуний текширув ва тасдиқлашни талаб қиладиган бир нечта техник жиҳатлар қолди», — деди Азизбек Урунов.

Ўзбекистон президентининг ЖСТ бўйича вакили Россия Федерацияси иқтисодий ривожланиш вазири Максим Решетников, Савдо музокаралари департаменти директори Екатерина Майорова, Россиянинг ЖСТдаги доимий вакили Николай Платонов ва бошқаларга «асосий сўровларга аниқлик киритгани, конструктив иштироки ва қўллаб-қувватлаши учун» миннатдорчилик билдирди.

Урунов жорий йилнинг декабрь ойида Женевада бўлиб ўтадиган ЖСТ Бош кенгаши йиғилишида Ўзбекистон ва Россия якуний натижаларни тақдим этишини таъкидлади.

«Шу билан бизда фақат Хитой Тайпейи (Тайван) билан икки томонлама музокараларни якунлаш қолди», — дея қўшимча қилди у.

Унинг қайд этишича, Урунов шу ҳафта ҳамкасблари билан учрашиш ва ЖСТ доирасидаги ҳамкорликни ривожлантириш учун Вашингтонда бўлади.

Сентябрь ойида Ўзбекистон ташкилотга аъзо бўлиш бўйича учта давлат — Аргентина, Австралия ва Гондурас билан протоколларни имзолади. Азизбек Урунов ЖСТнинг яна икки аъзоси билан принципиал келишувларга эришилганини қайд этганди.