Ўзбекистонда иш ҳақи, пенсия ва нафақалар 2030 йилгача инфляциядан юқори суръатларда оширилади. Бу ҳақда Иқтисодиёт ва молия вазирлигининг 2026 йилга мўлжалланган буджетномасида айтилади.

Макроиқтисодий ва фискал сиёсатнинг 2030 йилгача мўлжалланган асосий мақсадларига кўра, аҳолининг реал даромадларини ошириш учун буджет ташкилотлари ходимларининг иш ҳақи, пенсия ва нафақалар миқдорини ҳар йили инфляция даражасидан юқори миқдорда ошириш режалаштирилган.

Бунда давлат пенсия таъминоти тизимини ислоҳ қилиш орқали Иқтисодиёт ва молия вазирлиги ҳузуридаги бюджетдан ташқари Пенсия жамғармасига республика бюджетидан ажратиладиган трансфертлар ҳажмини қисқартириш назарда тутилмоқда.

Пенсия жамғармасининг 2026 йил бошига қолдиқ маблағлари 3,9 трлн сўм, даромадлари 64,7 трлн сўм, харажатлари эса 86,1 трлн сўм бўлиши прогноз қилинмоқда. Пенсия жамғармаси тақчиллигини қоплаш учун 2026 йилда бюджетдан 23 трлн сўмлик трансфертлар ажратиш режалаштирилган (13,8 фоизга ўсиш).

Кейинги йилларда Иқтисодиёт ва молия вазирлиги Пенсия жамғармаси тақчиллигини қоплаш учун ўтказмалар ҳажми пасайишини прогноз қилмоқда: 2027 йилда бу кўрсаткич 20 трлн сўмни, 2028 йилда эса 18 трлн сўмни ташкил этиши кутилмоқда.

2027 йилда Пенсия жамғармаси даромадлари 75 трлн сўмни, харажатлари эса 95,1 трлн сўмни ташкил этади. 2028 йилда даромадлар 87,8 трлн сўмга етади, харажатлар эса 104,8 трлн сўмдан ошади.

Келгуси уч йил ичида Ўзбекистонда пенционерлар сони 489 минг кишига кўпайиб, 4,76 млнга етади. Шу билан бирга, ҳар йили пенсия ёшига етадиган одамлар сони 5,1% га — 2025 йилдаги 305 мингдан 2028 йилда 321 минггача ўсади.

Иқтисодиёт ва молия вазирлиги маълумотларига кўра, буджет ходимлари иш ҳақининг ҳар бир 1 фоиз пунктга оширилиши буджетга 1,67 трлн сўмга тушмоқда. Пенсияларнинг худди шундай ўсиши — 861 млрд сўм. Ижтимоий нафақа олувчи оилалар сони 10% га ошса, буджет харажатлари қарийб 1,6 трлн сўмга кўпаяди.

Бюджетномадаги кўрсаткичлар Иқтисодиёт ва молия вазирлигининг жорий йил июль ойида тақдим этилган фискал стратегиясидан кескин фарқ қилади. Ўшанда 2028 йилда трансфертлар 26 трлн сўмга етиши кутилганди. Эҳтимол, пенсия ислоҳоти орқали тежамкорлик таъминланади.