Ўзбекистонда амалдорларнинг даромадларини декларация қилиш ва информаторларни ҳимоя қилиш бўйича қонун лойиҳалари ишлаб чиқилган. Бу ҳақда Халқаро валюта жамғармаси ходимларининг миссия якунлари бўйича баёнотида айтилади.

«Миссия «Манфаатлар тўқнашуви тўғрисида»ги қонуннинг тасдиқланиши ва коррупция фактларини фош қилувчи ахборот берувчиларни ҳимоя қилиш тўғрисидаги қонун лойиҳаси ҳамда активларни декларация қилиш тўғрисидаги қонун лойиҳасини Парламентга кўриб чиқиш учун топшириш бўйича ҳаракатларни олқишлайди», — дейилади хабарда.

Олий Мажлис Қонунчилик палатаси матбуот хизмати Спот сўровига жавобан маълум қилишича, ҳозирда қуйи палатага ахборотчиларни ҳимоя қилиш ва активларни декларациялаш тўғрисидаги қонун лойиҳалари киритилгани ҳақида маълумотга эга эмас.

2024 йил май ойида Халқаро валюта жамғармаси Ўзбекистон ҳукуматига яқин келажакда активларни декларациялаш ва манфаатлар тўқнашуви тўғрисидаги қонунларни амалга киритишни тавсия қилган эди.

Март ойида Коррупцияга қарши курашиш миллий кенгашининг кенгайтирилган йиғилишида Шавкат Мирзиёев ўз нутқида Ўзбекистонда давлат хизматчиларининг даромадларини декларация қилиш тўғрисидаги қонунни қабул қилиш вақти келганини айтиб, бу масалада жамоатчилик фикри муҳим роль ўйнашини таъкидлаган эди.

Мутасаддиларга тез фурсатда ушбу қонун лойиҳасини жамоатчилик муҳокамасига қўйиб, 1 апрелгача киритиш топширилди.

Президент ноқонуний бойлик орттирганлик учун жавобгарлик жорий этиш масаласини кўриб чиқиш зарурлигини таъкидлади. Хусусан, қонунчиликка ноқонуний бойлик орттириш тўғрисидаги моддани киритиш таклиф этилди. Бунда давлат хизматчиси ўзининг декларацияланаётган даромадига мос келмайдиган мол-мулкни қаердан олганини исботлаши керак бўлади.