Ўзбекистонда келаси йил учун мўлжалланган давлат бюджети лойиҳасига кўра, 2026 йил 1 январдан кўчмас мулк ва автотранспорт воситаларини ижарага берувчи жисмоний ва юридик шахслар учун ижара тўловининг энг кам ставкаларини ошириш таклиф этилмоқда.
Бунда мол-мулкни ижарага берувчи шахслар учун солиқ солиш мақсадида қўлланадиган ижара тўловининг минимал ставкаларини 7 фоизга индексация қилиш режалаштирилган.
Турар жойни ижарага бериш бўйича энг кам ставка қуйидагича белгиланиши кутилмоқда (1 квадрат метр учун ойига):
- Тошкент шаҳрида — 30 минг сўм (ҳозир 28 минг сўм);
- Нукус шаҳри ва вилоят марказларида — 14 500 сўм (ҳозир 13,5 минг сўм);
- бошқа аҳоли пунктларида — 5 900 сўм (ҳозир 5,5 минг сўм).
Нотурар жойни ижарага бериш бўйича энг кам ставка қуйидагича белгиланиши мумкин (1 квадрат метр учун ойига):
- Тошкент шаҳрида — 48 минг сўм (ҳозир 45 минг сўм);
- Нукус шаҳри ва вилоят марказларида — 28 400 сўм (ҳозир 26,5 минг сўм);
- бошқа аҳоли пунктларида — 11 800 сўм (ҳозир 11 минг сўм).
Енгил автомобилни ижарага беришнинг энг кам ставкаси ойига 918 мингсўм (ҳозир 858 минг сўм), микроавтобус, автобус ва юк автомобили учун 1 млн 824 минг сўм (1 млн 705 минг сўм эди) этиб белгилаш таклиф этилган.
Ҳужжат лойиҳасида қайд этилишича, ушбу ставкалар жисмоний ва юридик шахсларнинг мол-мулкни ижарага беришдан олинган даромадларига солиқ солиш мақсадида қўлланади ҳамда кўчмас мулкдан текин фойдаланиш шартномаларига (бундан яқин қариндошлар ўртасидаги тузилган шартномалар мустасно) нисбатан татбиқ этилади.
