Иқтисодиёт ва молия вазирлиги 2026 йил учун давлат бюджетига доир қонун лойиҳасини эълон қилди. Ҳужжатда қатор иқтисодий кўрсаткичлар ўрин олган.

Қонун лойиҳасида келаси йили давлат ходимлари иш ҳақи, пенсия, стипендия ва нафақалар миқдорини оширишга бюджетдан 6 трлн сўм ажратилиши белгиланган. Бунга айрим хизмат турлари нархи кўтарилиши ва қўшимча иш ўринлари яратилиши харажатлари ҳам киради.

Келаси йилларда аҳоли реал даромадларини кўтариш учун давлат ходимларининг иш ҳақи, пенсия ва нафақаларни йиллик инфляциядан юқори ошириб бориш режа қилинган. Прогнозларга қараганда, 2026 йилда Ўзбекистонда инфляция даражаси 7 фоиз атрофида шаклланиши кутилмоқда.

Вазирлик мамлакатда давлат ходимлари иш ҳақи 1 фоиз оширилса, бюджетдан қўшимча 1 трлн 697 млрд сўм ажратилиши кераклигини билдирди. Пенсия 1 фоиз кўтарилса, ортиқча 832 млрд сўм харажат қилиниши зарур.

Бюджет харажатларининг катта қисмини иш ҳақига тўловлар ташкил этади. Масалан, 2026 йилда иш ҳақи ва ижтимоий солиқ харажатлари учун давлат 172,8 трлн сўм ажратмоқчи. Бу 2025 йилги тасдиқланган режага нисбатан 18,5 трлн сўмга кўп. Келаси йилда ойликларга тўловлар давлат бюджети харажатларининг 42,9 фоизини ташкил этиши кутиляпти. Мазкур чиқимлар ялпи ички маҳсулотга нисбатан 8,7 фоизни ташкил этиши прогноз қилинмоқда. Шу билан бирга, 2026 йилда стипендияларга 2,2 трлн сўм тўланади. Пенсия тўловларига 86,1 трлн сўм, нафақаларга 14 трлн сўмдан ортиқ маблағ ажратилиши кутилмоқда.

Аввалроқ эълон қилинган Фискал стратегияда Ўзбекистонда 2026 йилда давлат ходимлари иш ҳақи, пенсия ва нафақалар миқдори камида 6-7 фоизга оширилиши белгиланганди. Шу билан бирга, келаси йилда давлат идоралари бюджетдан қанча пул олиши маълум қилинган.