Суд материаллари билан танишган манбаларга кўра, “Humans” МЧЖнинг мажбуриятлари бир нечта йўналишга тарқалган бўлиб, умумий қарз ҳажми жуда катта экани маълум қилинмоқда.

Mаълумотларга кўра:

— “OCTOBANK” АЖ олдидаги қарз 533 млрд сўмдан ошган.
— “ASIA ALLIANCE BANK” АТБга нисбатан 3,9 млн доллардан ортиқ мажбурият мавжуд.
— Yandex бренди остидаги компаниялар олдидаги қарз 13,3 млн доллардан зиёд.
— 5 нафар фуқаро олдида 571 млн сўм, “Service Vector” МЧЖ олдида 93 млн сўм қарз қайд этилган.
— Эски иш ҳақлари бўйича ҳам миллиардлаб сўм тўланмаган маблағлар юзасидан иш судга оширилган.

Суд ҳужжатларига илова қилинган рўйхатда яна қатор кредиторлар борлиги, вазиятнинг кўлами аввал ўйланганидан ҳам каттароқ эканини кўрсатмоқда. Қарзлар банклардан ташқари телеком оператори, давлат идоралари ва хусусий пудратчилар олдида ҳам тўпланган.

Айни пайтга қадар номлари тилга олинган банк ва компаниялардан расмий изоҳ берилмаган.

Аввалроқ Kun.uz нашри Humans алоқа операторининг Visa картасида пул сақлаган мижозлар пулларини оломаётганликлари борасида суриштирув олиб борган эди.

Шу билан бирга, Тошкент туманлараро иқтисодий судининг 14.10даги қарорига кўра, “Humans” МЧЖ банкрот деб топилган ва компания фаолиятини тўхтатмаган ҳолда тугатиш тартибида иш юритишни бошлаш ҳақида қарор қабул қилинган.

Маълумот учун, компаниянинг 2024-йил якуний кўрсаткичларига ўра умумий пул айланмаси 17 трлн 777 млрд сўмни, фаол фойдаланувчилар сони 2,3 млн кишини ташкил этган. Телеком мижозлари 1,55 млн, финтех хизматлари бўйича 701 минг фойдаланувчи қайд этилган.