Россиянинг Wildberries маркетплейси 2026 йил охиригача Ўзбекистонда йирик логистика марказини очишни режалаштирмоқда. Бу ҳақда Россия бош вазирининг биринчи ўринбосари Денис Мантуров маълум қилди.

3 декабрь куни Тошкентда Ўзбекистон ва Россия ўртасидаги иқтисодий ҳамкорлик бўйича Ҳукуматлараро комиссиясининг 26-йиғилиши бўлиб ўтди. Ўзбекистон ҳукумати номидан бош вазир ўринбосари Жамшид Хўжаев иштирок этган йиғилишда ижтимоий-иқтисодий, энергетика, қишлоқ хўжалиги, фармацевтика ва соғлиқни сақлаш ҳамда маданий-гуманитар соҳалардаги ҳамкорлик муҳокама қилинди.

Хусусан, томонлар фармацевтика ишлаб чиқаришини маҳаллийлаштириш, дори-дармонлар етказиб беришни кенгайтириш ва малакали кадрлар тайёрлаш масалаларини кўриб чиқди.

Савдо ва хизматлар соҳасини ривожлантириш, туризм лойиҳалари, гуманитар, илмий ва таълим алмашинуви, шунингдек, Ўзбекистонда атом электр станцияси қурилиши лойиҳасини амалга ошириш муҳимлиги таъкидланди.

Россия томони маълумотларига кўра, 2024 йилда Ўзбекистон ва Россия ўртасидаги товар айирбошлаш ҳажми 5% дан кўпроққа ошиб, $10 млрддан ошган (Миллий статистика қўмитаси маълумотларига кўра — $11,63 млрд). Жорий йилнинг тўққиз ойида ўзаро савдо ҳажми яна 8% га ошди. Қўшма инвестиция лойиҳалари портфели қарийб $55 млрдни ташкил этади.

Денис Мантуровнинг айтишича, Чирчиқ ва Жиззахдаги қўшма саноат паркларининг резидент компаниялари сони дунёнинг турли мамлакатларидан 30 дан ортиқни ташкил этади.

Бундан ташқари, мамлакатлар ўртасида бир неча йўналишларда энергетика соҳасидаги ҳамкорлик ривожланмоқда: Россия энергия ташувчиларини (газ, нефть ва нефть маҳсулотларини) етказиб бериш, геология-қидирув, тоғ-кон саноати, шунингдек, гидро ва атом энергетикаси соҳасидаги лойиҳаларни амалга ошириш.

Россия Федерацияси Бош вазирининг биринчи ўринбосари ўтган йил якунларига кўра, Wildberries платформасида сотилган Ўзбекистонда ишлаб чиқарилган маҳсулотлар ҳажми $605 млнни ташкил этганини қайд этди. Унинг таъкидлашича, Россия маркетплейси Ўзбекистон товарлари учун энг йирик савдо тармоғига айланди.

«Компания 100 минг квадрат метрга эга бўлган мамлакатдаги энг йирик логистика марказини қуришни режалаштирмоқда. Инвестициялар ҳажми 11 млрд рублдан ортиқ деб баҳоланмоқда, янги иш ўринлари сони эса қарийб 7,5 мингтани ташкил этади. Омбор мажмуасини босқичма-босқич ишга тушириш келаси йил охиригача режалаштирилган», — деди Мантуров.

Тадбир якунида Жамшид Хўжаев ва Денис Мантуров ҳукуматлараро комиссиянинг 26-йиғилиши баённомасини, шунингдек, 2025−2030 йилларга мўлжалланган ҳудудлараро ҳамкорлик «Йўл харитаси»ни имзолади.

Шу билан бирга, уларнинг иштирокида 2025−2026 йилларга мўлжалланган Бошқирдистон билан савдо-иқтисодий ҳамкорлик режаси, Россия Кичик ва ўрта бизнес корпорацияси ҳамда Ўзбекистон Енгил саноатни ривожлантириш агентлиги ўртасидаги меморандум имзоланди.