Алишер Усмонов фонди Тошкентнинг Эски шаҳарида арт-резиденциялар яратади
Ижодий масканни ташкил этиш бўйича пойтахтнинг Олмазор туманида жойлашган иккита объект танлаб олинди.
Миллиардер Алишер Усмоновнинг «Санъат, илм ва спорт» хайрия фонди Тошкентнинг тарихий Эски шаҳар ҳудудида арт-резиденциялар яратади. Бу ҳақда Маданият ва санъатни ривожлантириш жамғармаси хабар бермоқда.
Қайд этилишича, Маданият ва санъатни ривожлантириш жамғармаси Эски шаҳар ҳудудида арт-резиденциялар яратиш ташаббусини илгари сурмоқда.
Лойиҳа дизайн-консепсияси жаҳон талабларини инобатга олган ҳолда Марокашдаги Studio KO меъморчилик бюроси билан ҳамкорликда ишлаб чиқилади. Ушбу лойиҳа Алишер Усмоновнинг «Санъат, илм ва спорт» ҳайрия жамғармаси кўмагида амалга оширилади.
Маълум қилинишича, Ўзбекистон ва чет элликлар ичун ижодий масканни ташкил этиш бўйича пойтахтнинг Олмазор туманида жойлашган иккита объект танлаб олинган.
Биринчи обект Намуна маҳалласида жойлашган, анъанавий меъморий кўриниши сақлаб қолинган ҳамда қайта таъмирланган «Маткаримбой» мадрасаси бўлиб, ушбу манзил ижодий майдон яратиш учун хизмат қилади. Иккинчи обект эса эски болалар боғчаси — «Ҳаст Имом» маҳалласида жойлашган.