Мурожаатлар бўйича энг салбий кўрсаткичга эга 10 та банк номи эълон қилинди
Биринчи чорак билан таққослаганда, Топ-10 рўйхати ўзгарди. Ундан Давр Банк, Tengebank ва Агробанк чиқиб кетган бўлса, уларнинг ўрнини Infinbank, Ипотека-банк ва Капиталбанк эгаллади.
Марказий банк 2026 йилнинг иккинчи чораги якунлари бўйича банклар фаолиятига оид мурожаатлар таҳлили ва мурожаатлар индексини эълон қилди. Бу ҳақда регулятор матбуот хизмати хабар берди.
Ҳисобот даврида Марказий банкка тўғридан-тўғри ҳамда бошқа давлат органлари орқали банклар фаолияти юзасидан жами 11 331 та мурожаат келиб тушган.
Антирейтингда AVO Bank 4,42 индекс билан биринчи ўринни эгаллади. Ундан кейинги ўринларда Бизнесни ривожлантириш банки (2,78), Микрокредитбанк (2,69), TBC Bank (2,63) ва Anorbank (1,84) жойлашди. Шунингдек, Топ-10 рўйхатидан Infinbank ва Туронбанк (ҳар бири 1,46), Асакабанк (1,28), Ипотека-банк (1,09) ҳамда Капиталбанк (1,07) ҳам ўрин олди.
Биринчи чорак билан таққослаганда, Топ-10 рўйхати ўзгарди. Ундан Давр Банк (1,85), Tengebank (1,72) ва Агробанк (1,22) чиқиб кетган бўлса, уларнинг ўрнини Infinbank, Ипотека-банк ва Капиталбанк эгаллади.
Шу билан бирга, AVO Bank’нинг мурожаатлар индекси энг кескин ўзгариб, 2,16 дан 4,42 гача — икки баравардан кўпроққа ошди. Аксинча, Anorbank’да кўрсаткич 3,29 дан 1,84 гача пасайди. Бизнесни ривожлантириш банкида индекс 3,34 дан 2,78 гача, Микрокредитбанкда эса 3,23 дан 2,69 гача камайган. TBC Bank’да эса аксинча, кўрсаткич 2,06 дан 2,63 гача ошган.
Марказий банкнинг қайд этишича, мижозлар сонига нисбатан мурожаатлар улушининг юқорилиги айрим банкларда мижозларга банк маҳсулотлари ва хизматлари бўйича етарли тушунтириш бериш ҳамда мурожаатларга ўз вақтида ва сифатли жавоб тақдим этиш зарурлигини кўрсатмоқда.
Такрорий мурожаатларга сабаб бўлаётган тизимли камчиликларни бартараф этиш, мижозларга хизмат кўрсатиш сифати ва ички назорат механизмларини кучайтириш лозимлиги таъкидланди.
Шу муносабат билан регулятор банкларга мурожаатлар сабабларини чуқур таҳлил қилиш, уларни кўриб чиқиш жараёнларини такомиллаштириш ва мижозлар манфаатларини ҳимоя қилишга қаратилган чораларни кучайтиришни тавсия этди.
Таъкидланишича, мазкур индекс банкларнинг молиявий барқарорлиги ёки ишончлилигини баҳоламайди. У фақат фаол мижозлар сонига нисбатан келиб тушган мурожаатлар улушини акс эттиради.
Шунингдек, ҳисобот чорагида 100 тадан кам мурожаат келиб тушган банклар бўйича индекс ҳисобланмайди.
