Илон Маск Россия президенти Владимир Путинни яккама-якка жангга чорлади. Бу ҳақда миллиардер ўзининг Twitter саҳифасида ёзди.
Гаров сифатида Маск Украинани таклиф қилди.
«Бу жангга розимисиз?», — деб сўради Маск рус тилида Кремлнинг Twitter саҳифасини белгилаб.
Бироқ Кремль ўрнига Дмитрий Рогозин унга жавоб берди. «Роскосмос» директори Александр Пушкиннинг «Руҳоний ва унинг ишчиси Балда ҳақидаги эртак» асаридан тўртликни келтирди.
«Сен, тирранча, ҳали ёшсан, мен билан олишишга нимжонсан. Бу фақат вақтни беҳуда сарфлаш бўларди. Аввал менинг акамдан ўтиб кет-чи», дейилади Рогозиннинг жавобида.
Бундан олдин Маск ўз обуначиларига инфляция юқори бўлганида қаерга сармоя киритиш ҳақида маслаҳат берган эди. Унинг фикрича, ҳозирда долларда эмас, кўчмас мулк ёки истиқболли компаниялар акциялари каби «жисмоний нарсаларга» сармоя киритиш яхшидир.
Шу билан бирга, у ўзининг биткоинлари, Ethereum ёки Dogecoin криптовалюталарини сотмоқчи эмаслигини қўшимча қилди.
Аввалроқ Илон Маск Россия ОАВни Starlink орқали блоклашдан бош тортгани хабар қилинганди. Шунингдек, Дмитрий Рогозин Маскнинг Украинага Starlink етказиб берганини «урушдаги пиар» деб атагани ҳақида хабар берилди.
