Рамзан Қодиров Tesla ва SpaceX раҳбарига Путин билан баҳслашмасликни маслаҳат берганидан сўнг Telegram асосчиси Павел Дуров @elona манзилини Илон Маск учун банд қилди.
Канал эълон қилинган вақтда унга 30 мингга яқин киши обуна бўлди.
«Илон Рив Маск учун банд қилинган», дейилади канал тавсифида.
Бундан олдин Илон Маск Россия Президенти Владимир Путинни яккама-якка жангга чорлаб, Украинани гаров сифатида таклиф қилганди. Бизнесменга Путиндан ҳам, Кремлдан ҳам жавоб келмади, аммо Дмитрий Рогозин ва Рамзан Қодиров раддия берди.
«Роскосмос» директори Дмитрий Рогозин Александр Пушкиннинг «Руҳоний ва унинг ишчиси Балда ҳақидаги эртак» асаридан тўртликни келтирди.
«Сен, тирранча, ҳали ёшсан, мен билан олишишга нимжонсан. Бу фақат вақтни беҳуда сарфлаш бўларди. Аввал менинг акамдан ўтиб кет-чи», дейилади Рогозиннинг жавобида.
Қодиров, ўз навбатида, Маскни Путин билан «оғирлик тоифалари ўта фарқли экани» ҳақида огоҳлантирди. У Маскга «чиниқиш» ва «мулойим Илонадан кучли Илонга айланиш» учун Чеченистоннинг бир қанча марказларида машғулот ўташни тавсия қилди.
Илон Маскнинг онаси ҳам Қодировнинг постига муносабат билдирди ва ўзининг Twitter саҳифасида ўғлининг юзи фильтр ёрдамида аёл юзига ўзгартирилган суратни жойлаштирди.
«Сен жуда гўзалсан, Илона», — деб ёзди у.
Аввалроқ Илон Маск Россия ОАВни Starlink орқали блоклашдан бош тортгани хабар қилинганди. Шунингдек, Дмитрий Рогозин Маскнинг Украинага Starlink етказиб берганини «урушдаги пиар» деб атагани ҳақида хабар берилди.
