Дунёдаги энг йирик SpaceX Starship ракетасининг биринчи орбитал парвози 2022 йилнинг май ойида амалга оширилади. Бу ҳақда Илон Маск Twitter саҳифасида ёзди.
«Кейинги ойга келиб бизда 39 та парвозга яроқли двигатель бўлади, кейин уларни бирлаштириш учун яна бир ой керак бўлади. Умид қиламанки, биз май ойида орбитал парвоз синовларини бошлаймиз», — деди Маск.
Ракета дизайни энг янги Raptor 2 двигателларидан фойдаланади, уларнинг қуввати 230 тоннадан ошади. Тадбиркорнинг ўзи уларни олдинги версияга нисбатан кучлироқ ва ишончли деб атамоқда.
Учириш Техаснинг жануби-шарқидаги Бока Чика шаҳрида жойлашган SpaceX хусусий космодромидаги учириш майдончасидан амалга оширилади.
Бундан ташқари, Маск бир қатор твитларида унинг компанияси 2022 йилда орбитага 800 тоннага яқин юк етказиб беришини, қолган дунёда (асосан Хитойда) эса 400 тоннадан кам бўлишини эслатиб ўтди.
Аввалроқ Британиянинг OneWeb корпорацияси SpaceX билан сунъий йўлдошларни орбитага чиқаришга келишиб олгани ҳақида хабар берилганди. Бунгача OneWeb «Роскосмос» билан ҳамкорлик қилган. OneWeb сунъий йўлдошларининг биринчи учирилиши 2022 йилда бўлиб ўтади.
Шунингдек, SpaceX асосчиси Илон Маск Time журналига берган интервьюсида Марсга учиш бўйича ўзининг йирик лойиҳасини амалга ошириш муддати ҳақида сўзлаб бергани хабар қилинганди.
