Буюк Британия мамлакатнинг «олтин паспортлари»ни олган, кейин эса санкцияларга учраган саккиз нафар россиялик миллиардерни аниқлади. Бу ҳақда собиқ ички ишлар вазири Сюзан Уилямс баёнотига таяниб, Financial Times хабар берди.
Буюк Британияда Tier 1 инвестиция визаси дастури мавжуд бўлиб, у бадавлат россияликлар ва бошқа халқаро инвесторларни жалб қилган. Ариза берувчилар Буюк Британия иқтисодиётига сармоя киритиш учун камида 2 миллион фунт стерлингга эга эканини кўрсатиши керак эди. Бироқ, февраль ойида Буюк Британия ушбу дастурни ёпишга қарор қилди.
Бундан ташқари, расмийлар 2018 йилдан бери берилган визаларни текшириб келмоқда, бироқ ҳозирча натижаларни эълон қилмаган. 2020 йилда Британия парламентининг разведка ва хавфсизлик қўмитаси мамлакат жиноят йўли билан топилган пулларни ювиш учун «идеал механизмлар»ни тақдим этганини ва оффшор капитал учун халқаро «кир ювиш машинаси»га айланганини маълум қилди.
Статистик маълумотларга кўра, 2020 йилнинг сентябридан 2021 йилнинг сентябригача Буюк Британия 798 та инвестиция визаси берган, улардан 82 таси ёки 10,2 фоизи россияликлар томонидан олинган.
Британия Ташқи ишлар вазирлиги вакили алоҳида ҳолатларга тааллуқли тафсилотларни ошкор қилмаслигини, аммо Буюк Британия «ифлос пуллар» учун «хавфсиз бошпана» эмаслигини маълум қилди.
Буюк Британия АҚШ, Европа Иттифоқи ва Канада билан бир қаторда Россияга қарши бир неча марта санкциялар киритди. Миллирдерлар Роман Абрамович, Олег Дерипаска, Михаил Фридман, Пётр Авен, шунингдек, Алексей Мордашов, Андрей Мельниченко, Дмитрий Пумпянский, Виктор Вексельберг, Герман Хан ва бошқалар Британия санкцияларига учради.
Ғарбда «олигархлар» номи остида нафақат россиялик ишбилармонлар ва миллиардерлар, балки, энг йирик давлат компаниялари ва банклари раҳбарларини ҳам назарда тутилади. Лондон, масалан, «Роснефть» бош директори Игорь Сечин, ВТБ президенти ва бошқарув раиси Андрей Костин, «Газпром» бош директори Алексей Миллер ва «Транснефть» президенти Николай Токарёвга нисбатан чекловлар киритган.
ЕИ давлатлари, Буюк Британия, АҚШ ва Канада 27 февраль куни «олтин паспортлар» берилишини чеклаш ва санкцияларга учраган россияликларнинг активларини аниқлаш ва блоклаш бўйича ишчи гуруҳ тузишга келишиб олди. 10 март куни Европа парламенти инвестиция орқали фуқаролик бериш дастурларини чеклаш учун овоз берди.
Таъкидланишича, Фридман ва Авен доимий равишда Лондонда яшайди. Улар Британия матбуотида санкциялар туфайли пул олиш имкониятидан маҳрум бўлганлиги учун тозалаш ва шахсий ҳайдовчи учун пул тўлай олмаётганидан шикоят қилган.
Аввалроқ Буюк Британия Абрамовичнинг шериги ва Тиньковга нисбатан транспорт санкцияларини бекор қилгани ҳақида хабар берилганди. Шунингдек, Россиялик бизнесмен Евгений Чичваркиннинг Швейцария банкидаги ҳисоби музлатилгани хабар қилинди.
