Президент Шавкат Мирзиёв 2023 йилда Навоий вилоятида аграр соҳа, ичимлик суви ва автомобиль йўллари лойиҳаларига қўшимча маблағ ажратиш бўйича мутасаддиларга топшириқ берди. Бу ҳақда Президент матбуот хизмати раҳбари Шерзод Асадов хабар берди.

Қайд этилишича, Президент номзоднинг тақдимоти билан танишар экан, Навоийда 2023 йилда ижтимоий муаммоларни ҳал этишга қўшимча 655 миллиард сўм, оилавий тадбиркорликни ривожлантиришга яна 750 миллиард сўм ресурс ажратилишини таъкидлади.

Бундан ташқари, аграр соҳа, ичимлик суви ва автомобиль йўллари лойиҳаларига қўшимча 180 миллион доллар жалб қилиш бўйича топшириқ берилди.

Бу имкониятлардан фойдаланиб, келаси йил 240 минг аҳоли бандлигини таъминлаш шартлиги кўрсатиб ўтилди.

«2023 йил якуни билан Навоий камбағаллик ва ишсизликдан ҳоли ҳудудга айланиши шарт ва зарур», деди давлат раҳбари.

Туман ҳокимлари ҳар ой маҳаллий кенгашга маҳалла раислари ва фаоллари олдида  ҳисобот бериши таъкидланди.

Бундан буён вилоятда Администрация вакиллари иш олиб бориши, улар вилоятда аҳолини қийнаётган муаммоли масалаларни тезкор ечиш масалалари билан шуғулланиши қайд этилди.