Raqobatni rivojlantirish va iste’molchilar huquqlarini himoya qilish qo’mitasi “Lukoil” kompaniyasiga nisbtan narx manipulyatsiyasi bo’yicha ish qo’zg’atdi. Bu haqda qo’mita matbuot xizmati xabar berdi.

Ma’lum qilinishicha, qo’mita tomonidan “Lukoil Overseas Supply and Trading Ltd” kompaniyasining birja savdolarida texnik oltingugurt mahsulotini realizatsiya qilishda, shu jumladan, birja savdolarida mahsulot hajmlarini nomuvofiq qo’yish kabi manipulyatsiya holatlari orqali narx oshishiga olib kelgan harakatlarni sodir etgani aniqlangan.

Natijada, birja savdolarida texnik oltingugurt mahsuloti narxlari o’rtacha 10 foizdan 50 foizgacha oshgan.

Shu munosabat bilan, kompaniyaga nisbatan “Raqobat toʻgʻrisida”gi qonun va Vazirlar Mahkamasining 2020-yil 18-martdagi 170-sonli qarori bilan tasdiqlangan Nizom talablari buzilishi alomatlari boʻyicha ish qoʻzgʻatilgan.

“Qoʻzgʻatilgan ish oʻrnatilgan tartibda koʻrib chiqilib, qaror qabul qilingandan soʻng qoʻshimcha axborot beriladi”, deyiladi qo’mita xabarida.