Ijtimoiy tarmoqlarda madaniyat vaziri Ozodbek Nazarbekovning Toshkent shahridagi kiyim doʻkonlaridan birining reklama roligida suratga tushgani aks etgan videolar tarqaldi. Shundan soʻng, 3-iyul kuni Raqobatni rivojlantirish va isteʼmolchilar huquqlarini himoya qilish qoʻmitasi bunga munosabat bildirib, holat boʻyicha oʻrganish ishlari olib borilayotganini maʼlum qilgandi. Bugun, 5-iyul kuni Madaniyat vazirligi ham vazirning doʻkon reklamasida koʻrinish berishi boʻyicha rasmiy munosabat bildirdi.

Xabarda aytilishicha, Ozodbek Nazarbekov “Ovoz” loyihasining hakamlar hayʼati aʼzosi sifatida kiyim doʻkoniga tashrif buyurib, loyihaning navbatdagi sonini tasvirga olish jarayonida qatnashish uchun loyiha imijmeykeri bilan birgalikda libos tanlagan.

Madaniyat vazirligi Ozodbek Nazarbekov libos tanlash jarayonida oʻz shaxsiy fikrini bildirib, milliy brend rivoji uchun tavsiya berib oʻtgani, bundan hech qanday moddiy manfaatdorlik yoki reklama orqali naf olish maqsadi koʻzlanmaganini bildirgan.

“Bu orqali mamlakatimizda yaratib berilgan qulay biznes muhiti tufayli faoliyatini samarali yoʻlga qoʻygan, xorijnikidan aslo qolishmaydigan sifatli mahsulotlar tayyorlashga intilayotgan mahalliy ishlab chiqaruvchilarni qoʻllab-quvvatlash nazarda tutilgan. Yaʼni, bundan O.Nazarbekovning hech qanday moddiy manfaatdorligi yoki reklama orqali naf olish maqsadi koʻzlanmagan. O.Nazarbekov Madaniyat vaziri, qolaversa, Oʻzbekiston xalq artisti va davlat xizmatchisi sifatida Oʻzbekiston Respublikasining barcha qonunlarini hurmat qiladi va ularga qatʼiy rioya etadi”, deyiladi vazirlik munosabatida.

Shuningdek, Madaniyat vazirligi ommaviy axborot vositalari va jamoatchilikdan holatga xolisona baho berishni hamda jarayonni “nooʻrin ayblovlar” bilan yoritmaslikni soʻragan.

Eslatib oʻtamiz, Raqobat qoʻmitasi avvalroq “Lukoil” kompaniyasiga nisbatan birjadagi narxlarni sunʼiy oshirish alomati bilan ish qoʻzgʻatgan edi.