Iyun oyida “Cobalt” uchun tuzilgan shartnomalarning 57 foizi bekor qilingani maʼlum boʻldi
Bugun, 5-iyul kuni UzAuto Motors “Cobalt” uchun navbatdagi kontraktatsiya jarayonini oʻtkazib, unda 14250 ta avtomobilni qayta sotdi.
UzAuto Motors kompaniyasi bugun, 5-iyul kuni soat 10:00 dan boshlab “Cobalt” avtomobili uchun shartnoma berishni boshladi. 4 soat davom etgan savdolarda 14 ming 250 dona avtomobil uchun shartnoma tuzildi. Undan 14 ming 209 tasi jismoniy shaxslar, 41 tasi esa yuridik shaxslar hissasiga toʻgʻri keladi.
Kontraktatsiya jarayonida Savdo.uzavtosanoat.uz saytiga 5 mingga yaqin kiberhujumlar amalga oshirildi.
Eslatib oʻtamiz, “Cobalt” uchun avvalgi kontraktatsiya 2024-yilning 21-iyunida ochilgan boʻlib, unda 25 mingta avtomobil uchun shartnomalar berilgandi. Toʻlovi 7 kalandar kuni ichida amalga oshirilmagan va bekor qilingan shartnomalar bugun, 5-iyul kuni qayta savdoga qoʻyildi. Bunda oldingi kontraktatsiyada tuzilgan shartnomalarning 57 foizi qayta sotilgani oydinlashadi.
